پرەزيدەنت قاسىم-جومارت توقاەۆتىڭ بۇل جولعى جولداۋىندا ەڭ باستى نازار اۋداراتىن نارسە – «ادىلەتتى قازاقستان» قۇرۋدىڭ كونتسەپتسياسىن اتاپ, وعان اپاراتىن ناقتى قادامداردىڭ كورسەتىلۋى. جولداۋدى ازىرلەۋ بارىسىندا قوعام بەلسەندىلەرى مەن بىلىكتى ساراپشىلاردىڭ پىكىرى ەسكەرىلگەنى كورىنىپ تۇر. قوعام تاراپىنان ايتىلعان سىندى جانە وزەكتى ماسەلەلەردى دە تىزبەكتەپ, ولاردىڭ شەشۋ جولدارىن اتاپ كورسەتتى.
قاسىم-جومارت توقاەۆ قازىرگى ەلدەگى ەكونوميكالىق جانە ساياسي داعدارىستان شىعۋدىڭ باعىت-باعدارىن ايقىنداپ بەردى. جوعارى وقۋ ورنىنداعى ءبىلىم ساپاسىن ارتتىرۋ بويىنشا دا تاپسىرمالار بەردى. مەملەكەت ۇبت ناتيجەسىندە جانە باسقا دا كورسەتكىشتەر بويىنشا ءبىلىم بەرۋ گرانتتارىن ءارتۇرلى دەڭگەيدە ءبولۋدى جوسپارلاپ وتىر. ونىڭ كولەمى 30-دان 100 پايىز ارالىعىندا بولماق. وسى ۋاقىتقا دەيىن ۇبت-دان 50 بالل جيناعان بالانىڭ ءوزى تەحنيكالىق باعىتتا مەملەكەتتىك گرانتتى يەلەنىپ كەلدى. ال 120 بالل جيناعان بالا گۋمانيتارلىق نەمەسە مەديتسينا سالاسىندا گرانتتان تىس قالدى. ەندى ويلاپ قارايىق, تومەن بالمەن تۇسكەن بالا كۇردەلى ينجەنەرلىك باعىتتى قالاي مەڭگەرە الادى؟ سوندىقتان بۇل شەشىم وتە ادىلەتتى بولادى. وسىلايشا, جوعارى ءبىلىم سالاسىندا جاقسى رەفورمالار جۇرەدى.
ءبىلىم ساپاسىنا قاراي وقۋ باعاسىن ارتتىرۋ دا ماڭىزدى شەشىم. وقۋ ساپاسىن كوتەرۋ ءۇشىن وعان ەداۋىر قاراجات ءبولىنۋى كەرەك. قاراجات ءبولىنۋى ءۇشىن گرانتتىڭ سانى دا, قۇنى دا ارتۋى قاجەت. سوڭعى 3 جىلدا جوعارى گرانت مولشەرىمەن ستۋدەنتتەر قابىلداپ جاتىرمىز. گرانتتىڭ قۇنى ارتقاننان باستاپ ءبىز وقىتۋشىلاردىڭ جالاقىسىن كوبەيتۋگە, جاتاقحاناداعى ماتەريالدىق جاعدايدى تۇزەتۋگە, جاڭا قۇرال-جابدىقتار الۋعا, وزگە دە ءبىرشاما ماسەلەلەردى شەشۋگە مۇمكىندىك الدىق. قازىرگى ماقسات – ۋنيۆەرسيتەتىمىزدەگى اقىلى ءبولىمنىڭ قۇنىن دا گرانتتىڭ باعاسىنا جەتكىزۋ. سەبەبى وقۋ اقىسى وسكەن سايىن ۋنيۆەرسيتەتكە بولىنەتىن قارجى مولشەرى ۇلعايىپ, بۇل ءوز كەزەگىندە جاڭا مۇمكىندىكتەرگە جول اشادى. وسىلايشا, ۋنيۆەرسيتەتتىڭ ءتيىمدى جۇمىس ىستەۋىنە نەگىز قالىپتاسادى.
ء«بىلىم الۋعا جىلدىق 2-3 پايىزبەن جەڭىلدەتىلگەن نەسيە بەرىلەدى» دەگەن دە ۇلكەن جاڭالىق بولدى. پرەزيدەنت ايتپاقشى, بۇل شارالار جوعارى ءبىلىمنىڭ قولجەتىمدىلىگىن ارتتىرىپ قانا قويماي, قوعامداعى ارىپتەستىك پەن جاۋاپكەرشىلىك قاعيدالارىن نىعايتا تۇسەدى.
پرەزيدەنت ءوز جولداۋىندا ستۋدەنتتەردى جاتاقحانامەن قامتاماسىز ەتۋ ماسەلەسىن دە اتاپ, ونى شەشۋ مەحانيزىمىن ايتىپ ءوتتى. بۇل ماسەلە بارلىق ۋنيۆەرسيتەتتىڭ كۇن تارتىبىندە تۇر. بيىل گرانت, كۆوتا جانە اقىلى نەگىزدە وقۋعا تۇسكەن بارلىق 1-كۋرس ستۋدەنتتەرىن قاجەتتىلىگىنە قاراي جاتاقحانامەن قامتاماسىز ەتتىك. سونىمەن قاتار مەملەكەتتىك جانە ۋنيۆەرسيتەتتىڭ ىشكى گرانتىندا وقيتىن 2-3 كۋرس ستۋدەنتتەرىنە دە تولىقتاي ورىن ءبولۋدى كوزدەپ وتىرمىز. ارنايى كوميسسيا كۇن سايىن جۇمىس ىستەپ جاتىر.
پرەزيدەنتىمىز ءوز جولداۋىندا ادىلەتتىك پرينتسيپىمەن قوسا ەڭبەكقورلىق قاعيداسىن ەرەكشە اتاپ ءوتتى. بارىڭىزگە ءمالىم, وڭتۇستىك ءوڭىردىڭ حالقى وتە ەڭبەكقور كەلەدى, كاسىپكەرلىك داعدىلارى جوعارى. حالىقتىڭ ەجەلگى مادەنيەتى دە, رۋحاني كوشباسشىمىز ياساۋي بابامىزدىڭ ءىلىمi دە بىزگە ەڭبەكقورلىقتى دارىپتەيدى. سوندىقتان بىلتىر ۋنيۆەرسيتەتىمىزدىڭ 2022-2026 جىلعى ستراتەگيالىق جوسپارىن قابىلداعان كەزدە, ادىلەتتىك پەن ەڭبەكقورلىقتى وقۋ ورنىمىزدىڭ باستى قۇندىلىعى دەپ بەكىتتىك. پرەزيدەنتىمىزدىڭ دە وسى ەكى قاعيداعا نازار اۋدارۋى ءبىزدىڭ دۇرىس جولدا كەلە جاتقانىمىزعا دالەل بولا الادى. مويىنداۋ كەرەك, قازىر وڭاي اقشاعا ۇمتىلعانداردىڭ قاتارى از ەمەس. بۇل تۇسىنىكتى وزگەرتۋ ءۇشىن تۇپكى مادەنيەتىمىز بەن داستۇرىمىزگە ۇڭىلگەنىمىز ءجون. ءبىزدى قانشاما زار زاماننان امان الىپ قالعان ەڭبەكقورلىق ەدى. بويىمىزدا باتىلدىق تا, باتىرلىق تا بار. بىراق مىناۋ زاماندا بىزگە ەڭ قاجەتى – ادىلەتتىك پەن ەڭبەكقورلىقتى ناسيحاتتاپ, بويىمىزعا ءسىڭىرىپ, ادىلەتتى قازاقستاننىڭ جاڭا ساياسي مادەنيەتىن قالىپتاستىرۋ.
جانار تەمىربەكوۆا,
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى
تۇركىستان وبلىسى