ەل پرەزيدەنتى قاسىم-جومارت توقاەۆتىڭ جولداۋىنا حالقىمىزدىڭ اياۋلى پەرزەنتى د.قوناەۆتىڭ «قاي ىستە دە حالىققا سۇيەندىك, اينالىپ وتكەن جەرىمىز جوق» دەگەن ءسوزىن ارقاۋ ەتكىم كەلەدى. ءبىزدىڭ ەڭ باستى جەتىستىگىمىز – ءبىرتۇتاس ەلدىگىمىز. ال مەملەكەتتىڭ نەگىزى – حالىق. سول حالىقتىڭ مەملەكەت باسشىسىنىڭ ءار جولداۋىن ۇلكەن ۇمىتپەن, زور سەنىممەن كۇتەتىنى تاعى انىق.
مەملەكەت باسشىسى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى كەزەكتى جولداۋىندا «ورتا ءبىلىمنىڭ ساپاسى – تابىستى ۇلت بولۋدىڭ تاعى ءبىر ماڭىزدى شارتى. ءاربىر وقۋشىنىڭ ءبىلىم الىپ, جان-جاقتى دامۋى ءۇشىن قولايلى جاعداي جاسالۋعا ءتيىس» دەدى. وسىعان وراي ورتا ءبىلىم الۋشىعا جان-جاقتى قولايلى ورتا قالىپتاستىرۋعا ارنالعان «جايلى مەكتەپ» جوباسى ءبىلىم سالاسىن جەتىلدىرۋگە باعىتتالعان باستامالاردىڭ ءبىرى ەكەنى ءسوزسىز. سەبەبى جوبا شەڭبەرىندە مەملەكەت باسشىسى يننوۆاتسيالىق تەحنولوگيا ارقىلى وقۋ-تاربيە جۇمىسىن جاقسارتۋعا, جالپى ەلىمىزدە زاماناۋي تالاپقا ساي ءبىلىم وردالارىنىڭ كوپتەپ سالىنۋىنا ءمان بەرىپ وتىر.
بالالارىمىزدىڭ ءبىلىم الۋىنا قولايلى جاعداي تۋعىزۋ ءۇشىن, ەڭ الدىمەن, ءۇش اۋىسىمدىق مەكتەپتەر ماسەلەسى شەشىلسە دەيمىز. «جايلى مەكتەپ» ۇلتتىق جوباسى – ءبىلىم سالاسىندا ىلگەرىلەۋ ءۇشىن جاسالىپ جاتقان جاقسى قادام. تاعى ءبىر جاعىمدى جاڭالىق, ۇلت ۇرپاعىنىڭ ساپالى ءبىلىم الۋى ءۇشىن پەداگوگيكالىق جوعارى وقۋ ورىندارىن اككرەديتاتسيالاۋدىڭ جاڭا ستاندارتىن قابىلداۋ ماسەلەسى. بۇل جاعدايدا ۇستازداردىڭ قۇزىرەت اياسى ايقىندالىپ, ماماندىقتىڭ ابىروي-بەدەلى ارتا تۇسەرى انىق. باسەكەگە قابىلەتتى, وزگەرىسكە بەيىم, قوعامنىڭ تالابىنا ساي تۇلعانى قالىپتاستىرۋ ءۇشىن جاھاندىق عىلىمي-تەحنيكالىق باعىتتاعى پاندەردى تەرەڭدەتىپ, اعىلشىن تىلىندە وقىتۋدى كۇشەيتۋ ماڭىزدى. بىرنەشە ءتىلدى ءبىلۋدىڭ ارتىقتىعى جوعىن باسا ايتقان مەملەكەت باسشىسىنىڭ سوزىنە قوسىلا وتىرىپ, باسىم باعىتتى ءوز انا تىلىمىزگە اۋدارۋدى قولدايمىن. ۇلت بولىپ قالىپتاسۋ ءۇشىن انا ءتىلىمىزدىڭ دەڭگەيى ءبىرىنشى ورىندا تۇرۋعا ءتيىس. مەملەكەتتىڭ باستى كۇشى جاستاردا بولسا, جاستارعا ارتىلعان سەنىم ءوز ۇلتىنىڭ قۇندىلىقتارىن قۇرمەتتەۋمەن كورىنۋى كەرەك.
ءبىلىم سالاسىندا وقۋ-اعارتۋ مينيسترلىگىنىڭ مەملەكەت باسشىسىنىڭ تاپسىرماسىن ورىنداۋدا بەلسەندى ءىس-ارەكەتتەردى قولعا العانىنا كۋا بولىپ كەلەمىز. ماسەلەن, مينيسترلىك مۇعالىم مارتەبەسىن ارتتىرۋدا اتا-انالاردىڭ ۇلەسى زور ەكەنىن ەسكەرىپ, ەكىجاقتى ارىپتەستىك قارىم-قاتىناستى ورناتا وتىرىپ, ءبىلىم بەرۋ ۆاۋچەرلەرىن ەنگىزۋدى جوسپارلاپ وتىر. ۇلت ساپاسىنىڭ دامۋىنا تاعى ءبىر ۇلەس قوساتىن دۇنيە – مەملەكەت بولەتىن قاراجاتتىڭ ءبىلىم بەرۋ ەسەپشوتتارىندا جيناقتالۋى. ۇلتتىق قوردىڭ شىن مانىندە ۇلتتىق مارتەبەگە يە بولىپ, حالىقتىڭ يگىلىگىنە جۇمسالۋى كوپ ءتۇيىننىڭ شەشىمى بولارى انىق. بۇل باستاما ءاربىر بالانىڭ بولاشاعىنا قۇيىلاتىن ينۆەستيتسيا ەكەنىن ەسكەرگەنىمىز ءجون.
رىسجان شامۇراتوۆا,
نۇر-سۇلتان قالاسىنداعى «№2 «دارىن» ليتسەي-مەكتەپ-ينتەرناتىنىڭ باسشىسى