رەيتينگتە ءباسىمىز تومەن

گرەك-ريم كۇرەسىندە توپ-10 بالۋان­نىڭ قاتارىنا قازاقستاننىڭ ەكى وكىلى عانا ەنىپ وتىر. ولار – قورلان جاقانشا مەن المات كەبىسباەۆ. 55 كيلو سالماقتا سايىسقا ءتۇسىپ جۇرگەن 30 جاستاعى جاقانشا 2019 جىلى نۇر-سۇلتانداعى الەم چەمپيوناتىندا فينالعا دەيىن جەتىپ, جانكۇيەرلەردىڭ نازارىن وزىنە اۋدارعان بولاتىن. ودان بولەك, ول ازيا بى­رىنشىلىگىندە ءۇش رەت ءۇشىنشى ورىنعا تابان تىرەدى. قورلان قازىرگى كەزدە جەتىنشى ساتىعا جايعاستى. 67 كيلو سالماقتا ۇزدىك وندىقتى تۇيىندەپ تۇرعان 34 جاستاعى المات كەبىسباەۆ جا­يىندا ۇزاق اڭگىمەلەۋگە بولادى. ول – الەم چەمپيوناتىنىڭ بەس جانە ازيا ويىندارىنىڭ ەكى دۇركىن جۇل­دەگەرى, ازيا بىرىنشىلىگىنىڭ فينالىندا بەس مارتە بەلدەسىپ, ەكى التىن مەن ءۇش كۇمىس مەدال ولجالادى. بىراق بەلگرادقا باراتىنداردىڭ تىزىمىندە ەكەۋى دە جوق. سەبەبى بۇل جولى ۇلتتىق قۇراما باپكەرلەرى اسا جەڭىل سالماقتا امانعالي بەكبولاتوۆتى بوز كىلەمگە شىعارۋدى ءجون كورگەن ەكەن. ال المات بولسا, بىلتىر ۇلكەن سپورتتان قول ءۇزىپ, بۇل كۇندەرى ەلىمىزدىڭ جاسوس­پىرىمدەر قۇراماسىن جاتتىقتىرۋدا. مىنە, ۇزدىك­تەر تىزىمىنەن قازاقستاننىڭ وسى ەكى «كلاسسيگىنىڭ» عانا ەسىمدەرىن كەزىكتىردىك. ارينە, بۇل قۋاناتىنداي جاعداي ەمەس.

قازىرگى كەزدە ازەربايجان بالۋان­دارىنىڭ قارقىنى وتە كۇشتى. قاپ تاۋى بوكتەرىندە ورنالاسقان بۇل مەملەكەتتىڭ 10 بالۋانى ۇزدىكتەر ساناتىندا. سولار­دىڭ ەكەۋى الەمدىك رەيتينگتە كوش باس­تاپ تۇر. ولار – سانان سۋلەيمانوۆ (77 كيلو) مەن رافيگ گۋسەينوۆ (82 كيلو). العاشقىسىنىڭ الەم چەمپيوناتىنىڭ كۇمىس جۇلدەگەرى, ەۋروپا چەمپيونى دەگەن اتاعى بار. ەكىنشىسى – توكيو وليم­پياداسىنىڭ قولا جۇلدەگەرى, الەم چەمپيونى جانە ەۋروپا بىرىنشىلىگىنىڭ ءۇش دۇركىن جەڭىمپازى. پارسى ەلى پەحلەۆاندارى موحاممادرەزا گەراەي (67 كيلو) مەن موحاممادحادي ساراۆيگە (87 كيلو) دە تەڭ كەلەر ەشكىم جوق. گەراەي سوڭعى ءۇش جىلداعى بايراقتى باسە­كە­لەردىڭ بارلىعىندا جەڭىس تويى­ن تويلادى. ول وليمپيادا, الەم جانە ازيا چەمپيونى اتاندى. ساراۆي توكيوداعى ويىنداردا قولا السا, الەم جانە ازيا بىرىنشىلىكتەرىندە قارسىلاس شاق كەلتىرمەدى. گرۋزيا قۇراماسىنىڭ دا قوس قىرانى – لەري ابۋلادزە (63 كيلو) مەن ياكوب كادجايا (130 كيلو) UWW رەيتينگىندە الدارىنا جان سالار ەمەس. سونداي-اق جاپونيالىق كەن ماتتسۋي (55 كيلو), مولدوۆالىق ۆيكتور چوبانۋ (60 كيلو), ليتۆالىق كريستۋپاس شلەيۆا (72 كيلو) جانە سەربيالىق زۋرابي داتۋناشۆيلي (87 كيلو) سىندى دۇلدۇلدەر ءوز سالماقتارىندا دارا تۇر.

الەمدىك رەيتينگتە توپ-10-دىق­قا مىنا ەلدەردىڭ گرەك-ريم كۇرەسى شەبەرلەرى ەنىپ وتىر: ازەربايجان –10, رەسەي – 9, تۇركيا – 8, يران – 7, گرۋزيا, گەرمانيا, ما­جارستان – 5, جاپونيا, ارمەنيا, مولدوۆا, پول­شا – 4, قىرعىزستان, ۋكراينا, ليت­ۆا, نورۆەگيا – 3, قازاق­ستان, اقش, كۋبا, فينليانديا, سەربيا – 2, قىتاي, ءۇندىس­تان, وڭتۇستىك كورەيا, مىسىر, شۆەتسيا, ەس­تو­نيا, بەلارۋس, دانيا, الجير, بولگا­ريا, يتاليا جانە چيلي – 1.

ەركىن كۇرەستەگى جاعدايىمىز «كلاسسيكتەرگە» قاراعاندا ءبىرشاما جاقسى. قازىرگى كەزدە قازاقستاننىڭ التى بىردەي ورەنى ۇزدىك وندىقتىڭ قاتارىندا. ولار – نۇريسلام ساناەۆ (57 كيلو) – 6-ورىن, ازا­مات داۋلەتبەكوۆ (86 كيلو) پەن ولەگ بولتين (125 كيلو) – 7-ورىن, تالعات سىرباز (70 كيلو) – 8-ورىن, يۋسۋپ باتىر­مۇرزاەۆ (125 كيلو) – 9-ورىن جانە ادىلەت داۋلىنباەۆ (92 كيلو) – 10-ورىن.

كۇرەستىڭ بۇل تۇرىندە اقش-تىڭ الدىنا ەشكىم تۇسە الار ەمەس. بۇل ەلدىڭ 10 بالۋانى توپ-10-دىققا كىرگەنى بىلاي تۇرسىن, سولاردىڭ تورتەۋى الەمدىك رەيتينگتە كوش باستاپ تۇر. ولار – وليم­پيادانىڭ قولا جۇلدەگەرى, الەم چەمپيونى توماس گيلمان (57 كيلو), وليمپيادانىڭ قولا جۇلدەگەرى, الەمنىڭ ءۇش دۇركىن چەمپيونى كايل دەيك (74 كيلو), وليمپيادا چەمپيونى, الەم بىرىنشىلىگىنىڭ بەس دۇركىن جەڭىمپازى دجوردان بارروۋز (79 كيلو), وليمپيادا چەمپيونى جانە ءفيناليسى, الەمنىڭ ەكى دۇركىن چەمپيونى كايل سنايدەر (97 كيلو). سونىمەن قاتار ولاردىڭ ارقايسى پانامەريكا ويىندارى مەن بىرىنشىلىگىندە سان مارتە توپ جارعانىن دا ايتا كەتكەن ابزال. مىقتىلاردىڭ الدىڭعى لەگىندە يراننىڭ ەكى بالۋانى بار. ريو وليمپياداسىندا التىن, توكيودا كۇمىس الىپ, الەمنىڭ ءۇش دۇركىن چەمپيونى اتانعان حاسسان ياز­داني (86 كيلو) مەن الەم چەمپيونى كامران گاسەمپۋرگە (92 كيلو) بۇ­گىنگى تاڭدا تەڭ كەلەر ەشكىم جوق. وزگە سالماق دارەجەلەرىندە رەسەيلىك اباس­گادجي ماگومەدوۆ (61 كيلو), موڭ­عو­­ليا­لىق تۋلگا تۋمىر وچير (65 كيلو), قىرعىزستاندىق ەرنازار احما­تاليەۆ (70 كيلو) جانە گرۋزيالىق گەنو پەترياشۆيلي (125 كيلو) سىندى ساڭ­لاقتار دارا تۇر.

توپ-10 ەركىن كۇرەس شەبەرلەرى اراسىندا مىنا مەملەكەتتەردىڭ مارقاس­قالارى بار: رەسەي –11, اقش – 10, يران – 9, تۇركيا – 7, قازاقستان, ازەر­بايجان – 6, ءۇندىستان, گرۋزيا – 5, بەلارۋس, موڭعوليا – 4, ارمەنيا, جاپو­نيا, قىرعىزستان – 3, گەرمانيا, ماكە­دونيا, سلوۆاكيا, مىسىر, يتاليا, ۋكراينا – 2, بولگاريا, برۋنەي, پۋەرتو-ريكو, ماجارستان, پولشا, مولدوۆا, وزبەكستان, گرەكيا, كامەرۋن, فرانتسيا, كانادا جانە كۋبا – 1.

ايەلدەر كۇرەسىنەن جاپونيا قۇراما كومانداسىنىڭ 14 مۇشەسى ۇزدىك ون­دىقتىڭ تىزىمىنە ەنگەنىمەن, ولار­دىڭ بىرەۋىنە دە كوش باستاۋ باقىتى بۇيىر­مادى. بۇل رەتتە اقش-تىڭ اسىعى الشىسىنان ءتۇسىپ تۇر. بۇگىنگى تاڭدا امەريكالىق بالۋانداردىڭ تورتەۋى توپ جارۋدا. ولار – سارا حيلدەبارندت (50 كيلو), حەلەن لۋيزا مارۋليس (57 كيلو), فوررەست ەنن موليناري (65 كيلو) جانە ادەلاين ماريا گرەي (76 كيلو).

سوڭعى ۋاقىتتا قىرعىزستاننىڭ قىزدارى كەرەمەت ناتيجە كورسەتىپ جۇرگەنى بارشا جۇرتقا ءمالىم. وزدە­رىنىڭ ورەلى ونەرى مەن وراسان زور تابىس­تارىنىڭ ارقاسىندا بۇل كۇندەرى ايسۇلۋ تىنىبەكوۆا (62 كيلو) مەن مەيىرىم جۇمانازاروۆا (68 كيلو) ءوز سالماق دارەجەلەرى بويىنشا UWW رەيتينگىندە جەكە-دارا كوش باستاپ كەلەدى. ال اسا اۋىر سالماقتا سايىسقا ءتۇسىپ جۇرگەن ايپەرى مەدەتقىزى ەكىنشى ورىندى يەلەنۋدە. بۇل الاقانداي عانا قىرعىز ەلى ءۇشىن كەرمەت جەتىستىك ەكەنى ءسوزسىز.

قازاق قىزدارى اراسىندا ۇزدىكتەر تىزىمىنەن جالعىز عانا ءجاميلا باقبەر­گەنوۆانى كەزىكتىردىك. دەسەك تە الاش­تىڭ ارۋى قالىڭ توپتىڭ اراسىندا ەمەس, 72 كيلو سالماقتا كۇرەسەتىن بۇرىم­دىلاردىڭ كوش باسىندا. ءتىپتى اتاعى الىسقا جايىلعان تۇركيا­لىق بۋسە توسۋن, گەرمانيالىق اننا شەلل, جاپو­نيالىق ماساكو فۋرۋيتي, فرانتسيالىق ۆانەسسا ۆەسكان, موڭعوليالىق داۆااناسان ەنح-امار, ۇندىستاندىق ديۆيا كاك­ران سىندى بالۋانداردىڭ وزدەرى باقبەر­گەنوۆانىڭ ارتىنان سىعالاپ قالدى. مىق­تىلار كوشىن باستاپ تۇرعان جا­ميلاعا ءبىز الداعى جارىستا دا جارقىن جەڭىس تىلەيمىز. سونداي-اق موڭعو­ليالىق بولوتۋيا بات-وچير (53 كيلو), گەر­ما­­نيا­لىق نينا نەممەر (55 كيلو) جانە ۇندىس­تان­دىق ساريتا ساريتا (59 كيلو) تورت­كۇل دۇنيەنىڭ تەڭ­دەسسىزى دەپ تانىلۋدا.

توپ-10 بالۋانداردىڭ تىزىمىنە ەنگەندەردىڭ سانى جاعىنان جاپونيانىڭ الدا تۇرعانىن جوعارىدا ايت­تىق. ودان كەيىنگى ورىندارعا مىنا كومان­دالار جايعاستى: اقش – 10, موڭ­عوليا – 8, بولگاريا, ۋكراينا – 6, رەسەي, ءۇندىستان – 5, كانادا, بەلارۋس, گەر­مانيا – 4, رۋمىنيا, قىتاي, مولدوۆا, شۆەتسيا, پولشا, تۇركيا, قىرعىزستان – 3, برازيليا, ازەربايجان – 2, ەكۆادور, مەكسيكا, تۋنيس, نيگەريا, چەحيا, قازاقستان, فرانتسيا, مىسىر جانە ەستونيا – 1.

10 قىركۇيەكتە شىمىلدىعى تۇرىلە­تىن الەم چەمپيوناتىندا العاشقى بولىپ بوز كىلەمگە گرەك-ريم كۇرەسى شە­بەر­لەرى شىعادى. ولار ءۇش كۇن بويى ايقا­سادى. 12 قىركۇيەكتە بۇرىمدىلار وزدەرى­نىڭ العاشقى جۇلدەلەرىن ساراپقا سالادى. ال سوڭعى كۇندەرى ەركىن كۇرەس شەبەرلەرىنىڭ ونەرىن تاماشالايمىز. اتالعان دودا 18 قىركۇيەكتە ءوز مارەسىنە جەتەدى.