جان-جاقتان ءورت شىققاندا, جاڭبىر قۇيىپ وتسە دەپ تىلەدى جۇرت. كۇن بۇرىن زايساننىڭ دالاسى لاپ ەتسە, ەرتەسى التاي اۋدانىنىڭ اۋماعى كوك تۇتىنگە وراندى. كاتونقاراعاي مەملەكەتتىك ۇلتتىق تابيعي پاركىنىڭ تەرريتورياسىنان دا ءورت شىقتى. ايتەۋىر, بالەندەي شىعىن جوق.
ءتىلسىز جاۋدىڭ مۇنشالىقتى جيىلەپ كەتۋىنە سەبەپ, اپتالاپ تۇرعان ىستىق. شىعىستا جازدا بولماعان ىستىق بولدى. بۇتا-قاراعان شي تيسە, سىر ەتە تۇسەردەي كەۋىپ تۇر. زايسان اۋدانى, اينابۇلاق اۋىلدىق وكرۋگى اۋماعىنان شىققان ءورت تۋرالى اقپارات توتەنشە جاعدايلار قىزمەتىنە 3 قىركۇيەكتە كەلىپ تۇسكەن. ءورت سوندىرۋشىلەر وقيعا ورنىنا ىلەشالا جەتكەنىمەن, قۇرعاق ءشوپتى قۋالاي شارپىعان قىزىل جالىن دالالى جەرلەرگە تەز تاراعان. بالكىم, ءورت ءسوندىرۋ تەحنيكالارى ساعاتتاي ساقىلداپ تۇرماعان سوڭ دا جالىن وڭايشىلىقپەن بوي بەرمەدى مە, كىم ءبىلسىن؟!
وبلىستىق تجد ماماندارىنىڭ ايتۋىنشا, زايسان دالاسىنان شىققان ءورتتى ءسوندىرۋ ءۇشىن قۇرامنان 16 ادام, 4 تەحنيكا جۇمىلدىرىلعان. ورمانشىلاردان 30 قىزمەتكەر جانە 6 تەحنيكا ورتپەن كۇرەسكەن. مامانداردىڭ سوزىنە سۇيەنسەك, جالاڭداعان جالىندى ءسوندىرۋ وڭاي بولماعان. ۇدەگەننىڭ ۇستىنە ۇدەي تۇسكەن. نەگە دەسەك, بىرىنشىدەن, وت شىققان جەرگە جەتۋ قيىن بولسا, ەكىنشىدەن جەلدىڭ كۇشى وتتى ودان سايىن ىشقىنتا ءتۇسىپتى. ابىروي بولعاندا, ەكپىندەي تۇسكەن ءورت ەلدى مەكەنگە جەتپەي ءسوندىرىلدى. بار كۇشىن سالعان ءورت سوندىرۋشىلەر, ورمانشىلار 17 ساعات, 25 مينۋتتا ءورتتى اۋىزدىقتاي العان. ەرتەسى ەسەپ جۇرگىزگەن ماماندار 45 گەكتار جەردى وتقا ورانعانىن انىقتادى. از جەر ەمەس. ءورتتىڭ شىعۋ سەبەپ-سالدارىن انىقتاۋ ارنايى مامانداردىڭ مىندەتى.
زايسان اۋدانىنداعى الاپات ءورت سوندىرىلگەنى سول ەدى, ءتىلسىز جاۋ التاي اۋدانىنىڭ تاۋلى اۋماقتارىن شارپىدى. مۇنداعى ءورتتى سوندىرۋگە «زىريان ورمان شارۋاشىلىعى» كمم, «بىكوۆ» ورمانشىلىعى اۋماعىنداعى ورمانشىلار, تجد ءورت سوندىرۋشىلەرى, جەرگىلىكتى اتقارۋشى ورگاندار جۇمىلدىرىلدى. الدىن الا بولجام بويىنشا ءورت الاڭى 367 گەكتارعا جايىلعان. ونىڭ ىشىندە 167 گەكتار ورمانسىز ايماق بولسا, 200 گەكتار اۋىلدىق وكرۋگتىڭ جەرلەرى.
«قازاۆياورمانقورعاۋ» ان-2 ۇشاعى اۋەدەن دە بارلاپ كورىپ, ەلدى مەكەندەرگە قاۋىپتىڭ جوقتىعىن انىقتادى. ەڭ جاقىن اۋىل ورتكە ورانعان جەردەن 25 شاقىرىم ەكەن. بىراق مۇندايدا ارقانى كەڭگە سالۋعا بولمايدى. جەل كۇشەيسە, 25 شاقىرىمدى ءاپ-ساتتە ورتەڭ دالاعا اينالدىرادى.
بوي بەرمەگەن ءورتتى ءسوندىرۋ ءۇشىن «قازاۆياورمانقورعاۋ» مم-نەن 340-تان استام ادام مەن 25 تەحنيكا جۇمىلدىرىلدى. قوسىمشا سۋاعار قۇرىلعىسى بار شقو اپ مي-8 تىكۇشاعى ىسكە قوسىلدى. قازىرگى تاڭدا وبلىستىڭ تجد-دە جانە ءورت ورنىندا جەدەل شتابتار جۇمىس ىستەيدى. جاعداي باقىلاۋدا. ءورت تولىق اۋىزدىقتالا قويعان جوق. بارىنەن دە جايقالعان ورمانعا, قۇلپىرعان تابيعاتقا وبال. ورتتەن جەردىڭ جاقىن ون جىلدىقتا قالپىنا كەلمەيتىنى جانە بار. سول ءۇشىن دە ورماندى جەرگە بارعاندا جاققان وتتى ابدەن ءسوندىرىپ جۇرگەن ابزال. ءبىر تال سىرىڭكە مىڭداعان گەكتار ورماندى وتقا وراماسىنا كىم كەپىل؟! سوندىقتان اسا اباي بولۋ كەرەك.
شىعىس قازاقستان وبلىسى