الەۋمەتتىك جەلىدە جاتاقحانا بەرىلمەگەن الماتىلىق ستۋدەنتتەر تۋرالى اقپارات تارادى. عىلىم جانە جوعارى ءبىلىم مينيسترلىگى اتالعان دەرەككە قاتىستى تۇسىنىكتەمە بەردى, دەپ حابارلايدى Egemen.kz.
«الەۋمەتتىك جەلىلەردە پايدا بولعان جاريالانىمداردى تالداۋ جانە تەكسەرۋ بارىسىندا اقپاراتتىڭ شىنايىلىعى راستالمادى. وسىلايشا الماتىدا باسپاناسىز قالعان ستۋدەنتتەر تۋرالى اقپاراتتى جوققا شىعارامىز. تۇنگى ۋاقىتتا كوشەدە جۇرگەن جاستار بەينەلەنگەن ۆيدەوروليكتىڭ شىعۋ تەگى بەلگىسىز», دەلىنگەن مينيسترلىكتىڭ Facebook پاراقشاسىندا.
ۆەدومستۆو مالىمەتىنشە, ۋنيۆەرسيتەتتەر شاكىرتتەردى جاتاقحاناداعى ورىندارمەن قامتاماسىز ەتۋدە. سونداي-اق قاجەت بولعان جاعدايدا ورىن جەتپەگەن ستۋدەنتتەر حوستەلدەر مەن قوناقۇيلەرگە ورنالاستىرىلادى. «عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ ستۋدەنتتەردى جاتاقحانامەن قامتۋ ماسەلەسى تولىق شەشىلگەنشە الماتىدا بولادى. ول جاعدايدى تىكەلەي باقىلاۋىندا ۇستايدى», دەلىنگەن جازبادا.