توتەنشە جاعدايلار مينيسترلىگى قوستاناي وبلىسىنداعى تابيعي ءورت بويىنشا 5 قىركۇيەك ساعات 13.00-دەگى جەدەل اقپاراتتى جاريالادى, دەپ حابارلايدى Egemen.kz قر تجم ءباسپاسوز قىزمەتىنە سىلتەمە جاساپ.
ء«ورت ءسوندىرۋ ورمان ايماعىندا 5 ۋچاسكەدە (امانقاراعاي, لەسنوە, وزەرنوە, باعانالى جانە كالينينو اۋىلدارى اۋدانىندا) جۇرگىزىلەدى (جيەگىنىڭ جالپى ۇزىندىعى 5 كم). بارلىعى 91 تۇرعىن ءۇي زارداپ شەكتى: امانقاراعاي اۋىلىندا 85 جانە وزەرنىي اۋىلىندا 6.
ءورتتى سوندىرۋگە 224 بىرلىك تەحنيكا, 7 اۋە كەمەسى, 5 ءورت ءسوندىرۋ پويىزى, جەكە قۇرامنان 2193 ادام كۇشتەر مەن قۇرالدار جۇمىلدىرىلدى. سونداي-اق ءورتتى سوندىرۋگە جانە قوعامدىق ءتارتىپتى ساقتاۋ ءۇشىن ءىىم جەكە قۇرامىنان قوسىمشا 300 ادام جۇمىلدىرىلدى», دەلىنگەن ءباسپاسوز قىزمەتى تاراتقان حابارلامادا.
قر تجم مالىمەتى بويىنشا, 10 ادام (5 ادام, ونىڭ ىشىندە ءبىر كامەلەتكە تولماعان ادام, ورمان شارۋاشىلىعىنىڭ 1 قىزمەتكەرى, اكىمدىكتىڭ 1 قىزمەتكەرى, تجم 3 قىزمەتكەرى) جاراقات, كۇيىك الىپ, جەڭىل جانە ورتاشا اۋىرلىقتاعى ۋلانۋ وقيعالارىنا ۇشىرادى, 1935 جىلعى تۋعان ءبىر ادام قازا تاپتى.
«سۋ قۇيۋ قۇرىلعىلارى ءۇشىن تىكۇشاقتارمەن سۋ الۋ تابيعي سۋ قويماسىنان 25 كم قاشىقتىقتا جۇرگىزىلەدى. ءورت ءسوندىرۋ جۇمىستارى باستالعالى بەرى اۋەدەن 109 رەت سۋ شاشىلدى. «قازگيدرومەت» رمك دەرەكتەرى بويىنشا 5 قىركۇيەكتە قوستاناي وبلىسى اۋليەكول اۋدانىنىڭ اۋماعىندا جوعارى تەمپەراتۋرا 31 گرادۋسقا دەيىن ساقتالادى, جەلدىڭ جىلدامدىعى سەكۋندىنا 7 مەترگە دەيىن جەتەدى.
4 قىركۇيەكتە ءورت اۋماعى 43 مىڭ گەكتاردان استى, ورمان شارۋاشىلىعىنىڭ جالپى اۋدانى 107 257 گا. حالىقتىڭ قاۋىپسىزدىگىن قامتاماسىز ەتۋ ماقساتىندا وزەرنوە اۋىلىنان (250 ادام), امانقاراعاي اۋىلىنىڭ سولتۇستىك بولىگىنەن (1000 ادام), كالينينو اۋىلىنان (228 ادام) جانە لەسنوە اۋىلىنان (363 ادام) جالپى بارلىعى 1841 ادام ەۆاكۋاتسيالاندى», دەلىنگەن حابارلامادا.
جەلدىڭ كۇشەيۋىنە بايلانىستى ءورتتىڭ ورمان القابىنان باعانالى اۋىلىنا كوشۋ قاۋپىنە بايلانىستى باعانالى اۋىلىن قورعاۋعا كۇشتەر مەن قۇرالدار توپتاستىرىلدى. قازىرگى ۋاقىتتا ەكى ءورت وشاعى جانىپ جاتىر. جەرگىلىكتى اتقارۋشى ورگاندار باعانالى اۋىلىنان 11 ادامدى, ونىڭ ىشىندە 2 بالانى قازباسى اۋىلىنا ەۆاكۋاتسيالادى.
وقيعا ورنىندا تجم 10 بىرلىك تەحنيكا, جەكە قۇرامنان 52 ادام, 4 اۋە كەمەسى (تجم-3, قم-1), جاو 5 بىرلىك تەحنيكا, 14 ادام, قم 9 بىرلىك تەحنيكا, ۇۇ 400 ادام جۇمىس جاساۋدا.
تجم مەن قوستاناي وبلىسىنىڭ تجد جەدەل جەلى جۇمىس ىستەيدى, پسيحولوگتار جۇمىسى ۇيىمداستىرىلدى. تجم جەدەل جەلىسىنە اقپاراتتىق سيپاتتاعى 34 قوڭىراۋ كەلىپ ءتۇستى.
57 ادامعا جانە توپتىق جۇمىس فورماتىندا 45 بالاعا كونسۋلتاتيۆتىك كومەك كورسەتىلدى.
نوۆونەجەنكا اۋىلىندا قر تجم 52859 اسكەري ءبولىم كۇشىمەن زارداپ شەككەن حالىقتى قابىلداۋ ءۇشىن پالاتالار تىگىلدى.