ەگىن جيناۋ ناۋقانى باستالعالى بەرى قازاقستاندىق شارۋالار 6,1 ملن گەكتاردان ءداندى جانە ءداندى-بۇرشاقتى داقىلداردى جيناپ ۇلگەردى. بۇل جوسپاردىڭ 38 پايىزدان استامىن قۇرايدى.
اۋىل شارۋاشىلىعى مينيسترلىگىنىڭ رەسمي مالىمەتىنە سۇيەنسەك, ورتاشا ونىمدىلىك گەكتارىنا 12,3 تسەنتنەردى قۇراپ وتىر. ازىرشە 7,5 ملن توننا استىق باستىرىلعان. بۇل وتكەن جىلعى كورسەتكىشتەن 2,5 ملن تونناعا ارتىق. 2021 جىلدىڭ 1 قىركۇيەگىندە 5,1 ملن توننا باستىرىلعان ەدى.
بيىل ونىمدىلىكتىڭ وسۋىنە اۋا رايىنىڭ قولايلىلىعى, سونداي-اق كوكتەمگى دالا جۇمىستارى كەزىندە اگروتەحنيكالىق شارالار كەشەنىن ۋاقتىلى جۇرگىزۋ جانە وسىمدىكتەردىڭ ءوسىپ-ءونۋ كەزەڭىندە قولايلى فيتوسانيتاريالىق جاعدايدى قامتاماسىز ەتۋ ىقپال ەتكەن.
مينيسترلىكتىڭ مالىمەتىنشە, ىشكى تۇتىنۋ مەن قازاقستاندىق نارىقتى قامتاماسىز ەتۋگە جانە بيدايدىڭ ءبىر بولىگىن ەكسپورتقا جونەلتۋ ءۇشىن استىقتىڭ جەتكىلىكتى كولەمى الىنادى دەپ بولجانىپ وتىر.
قارجىلاندىرۋعا كەلەتىن بولساق, 2022 جىلى بيۋدجەتتىك كرەديت 140 ملرد تەڭگەنى قۇرادى. بۇل – 2021 جىلعى دەڭگەيدەن ەكى ەسە جوعارى. استىقتى فورۆاردتىق ساتىپ الۋ شەڭبەرىندە قارجىلاندىرۋ 100 ملرد تەڭگەگە دەيىن كوبەيدى نەمەسە ءبىر جىل بۇرىنعىعا قاراعاندا 2,5 ەسە ارتتى.
مەملەكەت باسشىسىنىڭ تاپسىرماسىن ىسكە اسىرۋ اياسىندا «جاسىل دامۋ» اق قاراجاتى ەسەبىنەن اۋىل شارۋاشىلىعى تەحنيكاسىن جەڭىلدىكپەن نەسيەلەۋ تەتىگى پىسىقتالعانىن اتاپ ءوتۋ قاجەت. جەڭىلدىكتى ليزينگكە شامامەن 40 ملرد تەڭگە ءبولىندى.
بۇعان قوسا ەگىن جيناۋ جۇمىستارىن ۋاقتىلى جۇرگىزۋ ءۇشىن اۋىل شارۋاشىلىعى تاۋارىن وندىرۋشىلەرگە 423,5 مىڭ توننا جەڭىلدەتىلگەن ديزەل وتىنى ءبولىندى.
مينيسترلىك ەگىن جيناۋ جۇمىستارىن تابىستى جۇرگىزۋ ماسەلەسىن تۇراقتى باقىلاۋدا ۇستاپ وتىر. ول ءۇشىن ۆەدومستۆودا بارلىق تۋىنداعان ماسەلەنى ۋاقتىلى شەشۋگە ارنالعان جەدەل شتاب جۇمىس ىستەيدى.