بۇگىن مەملەكەت باسشىسى قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» تاقىرىبىنداعى جولداۋىن زەيىن قويا تىڭداپ, وي ەلەگىنەن وتكىزىپ, كوڭىل تارازىسىنا سالىپ تىڭدادىق. پرەزيدەنتىمىز الدىمىزعا قويىپ وتىرعان اسقارالى مىندەتتەر ءومىردىڭ وزىنەن ويىپ الىنعان جايلار. بار ءسوزى, تۇتاس باعىتى, سارابدال سالماعى كوپشىلىكتىڭ كوكەيىندە جۇرگەن دۇنيە.
الدىمىزداعى اداستىرماس جول سىلتەر, اينىتپاس باعىت بەرەر تەمىرقازىق نىسانا دا وسى. جەكە ءوز باسىم ۇزاق جىل ءبىلىم بەرۋ سالاسىندا ەڭبەك ەتىپ كەلە جاتقاندىقتان تابيعاتىمىزعا ءبىر تابان جاقىن ءبىلىم بەرۋ سالاسىنا قاتىستى پرەزيدەنت پىكىرىن مەيلىنشە مۇقيات تىڭدادىم. ايتىلعان كەسەك تە كوكەيكەستى ماسەلەلەر كوپ كوڭىلىنەن شىققانىنا ەش ءشۇبا جوق. ماسەلەن, پرەزيدەنت «ەل بولامىن دەسەڭ, بەسىگىڭدى تۇزە» دەپ باستادى ءوز ءسوزىن. وسى ءبىر اۋىز ءسوزدىڭ استارىندا ۇرپاق تاربيەسىنە قاتىستى مىڭ باتپان سالماقتىڭ مەنمۇندالاپ جاتقاندىعى شىندىق. بالا تاربيەسىن باسىنان باستاۋىمىز كەرەك. ونىڭ ىشىندە مەكتەپكە دەيىنگى تاربيە مەكەمەسىندە. ءتالىمدى تاربيەنىڭ تاماشا ءورىمى وسى جەردە باستالىپ, وسى جەردە ءبۇر جارسا قۇبا-قۇپ. جولداۋدا ايتىلعان 2-دەن 6 جاسقا دەيىنگى بالالاردىڭ جارتىسىنان استامى عانا بالاباقشاعا بارادى. مۇنداي ولقىلىققا جول بەرۋگە بولمايدى دەگەن پىكىرىنە بولە-جارا توقتالساق, ارتىقتىعى بولماس. ءححى عاسىردا مۇنداي مۇشكىل حالدە وتىرعانىمىزدىڭ ءوزى ۇيات. مۇنىڭ ارعى جاعىندا الەۋمەتتىك قيىن جاعدايدىڭ قالىپتاسىپ وتىرعاندىعىن جاسقانباي ايتۋىمىز كەرەك. بالالاردىڭ بالاباقشاعا بارا الماۋى, ولاردىڭ دۇرىس تاربيەسىنە عانا ەمەس, وتباسىنىڭ جاعدايىنا دا اسەر ەتەدى. جاس شاڭىراقتىڭ ءجيى شايقالۋى دا وسىنداي ولقىلىقتىڭ سالدارى. جولداۋدا بالالاردى بالاباقشامەن قامتاماسىز ەتۋ ماسەلەسىن تۇپكىلىكتى شەشۋ مىندەتى قويىلىپ وتىر. ونىڭ ۇستىنە تاربيەشىلەردىڭ الەۋمەتتىك مارتەبەسىن ارتتىرىپ, جالاقىسىن كوبەيتۋ كەرەك ەكەندىگى دە ايتىلدى. ءبىز كۇندەلىكتى ومىردە مەكتەپكە دەيىنگى مەكەمەلەردە جۇمىس ىستەيتىن تاربيەشىلەردىڭ جالاقىسى از ەكەنىن كورىپ, ءبىلىپ ءجۇرمىز. جالاقى از بولعاننان كەيىن ولاردان زامان تالابىنا تولىق جاۋاپ بەرەتىن جۇمىس سۇراۋدىڭ ابەستىك. بۇل پىكىردى بارلىق تاربيەشىلەردىڭ قۋانا قۇپتايتىنى داۋسىز. ءارى وسى سالاداعى ماماندارعا قويىلاتىن ناقتى تالاپتاردىڭ بەكىتىلۋى تيىستىگى دە ايتىلدى. وعان قوسا جۇمىس جۇكتەمەسىنىڭ دە بىرتىندەپ ازاياتىندىعى ءمالىم بولدى. بالا تاربيەسىندەگى ولقى ءتۇسىپ جاتقان وسى ءبىر جاي وتە دۇرىس كوتەرىلىپ وتىر.
ءوز ىسىنە ادال ۇستازدار ءبىلىم بەرۋ سالاسىنىڭ دامۋىنا زور ۇلەس قوسادى. بۇل پىكىر وسى جولداۋدا ايتىلدى. كۇندەلىكتى ومىرمەن بايلانىستىراتىن بولساق, وبلىس ورتالىعىنداعى اقان سەرى اتىنداعى جوعارى مادەنيەت كوللەدجىندە كاسىبي بىلىكتى ماماندار دايىندالۋدا. ولار قاشاندا سۇرانىسقا يە. ءبىزدىڭ ىستىق ۇيامىزدان تۇلەپ ۇشاتىن تۇلەكتەردىڭ قوعامعا قاجەت ەكەندىگىن ءار جىل سايىن جۇمىسقا ورنالاسۋ كورسەتكىشىنەن كورىپ, ءبىلىپ وتىرمىز. ونەر مەن مادەنيەت سالاسىنا قىزمەت ەتەتىن كوللەدج تۇلەكتەرى ەل بەسىگىن تۇزەۋگە ءوز ۇلەسىن قوسۋدا. وسى ورايدا ەل پرەزيدەنتىنىڭ ادىلەتتى قازاقستاندى قۇرۋ ىسىندە مۇعالىمدەردىڭ ءرولى ايرىقشا ەكەندىگىن ايتۋى وتە ورىندى بولدى دەپ ەسەپتەيمىن. شىنىن ايتۋ كەرەك, سوڭعى جىلدارى ۇستاز ماماندىعىنىڭ ابىروي-بەدەلىن ارتتىرۋ باعىتىندا كوپ جۇمىس جاسالۋدا. بۇل ءبىزدى قۋانتادى, قاناتتاندىرادى. الداعى ۋاقىتتا دا زامانداستارىمىزدىڭ رۋحاني الەمىن نۇرلاندىراتىن, ۇلى ءومىردى سۇيە بىلۋگە جانە سۇيىكتى بولۋعا باۋليتىن مامانداردىڭ ساپاسىن ارتتىرۋ باعىتىندا جۇمىس ىستەي بەرەمىز.
شاعىن پىكىردە بار جايدى قامتىپ, تۇگەل ايتىپ شىعۋ مۇمكىن ەمەس. شيراتىپ ايتقاندا, جولداۋدىڭ ايرىقشا ماڭىزدىلىعى كورىنىپ تۇر. قوعامدىق ومىرىمىزدەگى بار سالانى تۇگەل قامتىعان دەسە دە بولارلىق.
قۇرالاي ىدىرىسوۆا,
اقان سەرى اتىنداعى جوعارى مادەنيەت كوللەدجىنىڭ ديرەكتورى, ىبىراي التىنسارين اتىنداعى توسبەلگىنىڭ يەگەرى.