قر پرەزيدەنتى ءىس باسقارماسى مەديتسينالىق ورتالىعىنىڭ باسشىسى ساۋلە قيسىقوۆا مەملەكەت باسشىسى جولداۋدا دەنساۋلىق ساقتاۋ ماسەلەلەرىنە ەرەكشە نازار اۋدارعانىن اتاپ ءوتتى, دەپ حابارلايدى Egemen.kz.
«مەملەكەت باسشىسى قاسىم-جومارت توقاەۆتىڭ بۇگىنگى قازاقستان حالقىنا جولداۋىن تىڭداپ, مازمۇنىنىڭ وزەكتىلىگىن اتاپ وتكىم كەلەدى. جولداۋ بارلىق قازاقستاندىقتارعا قاتىستى ەكەنى ءسوزسىز.
قاسىم-جومارت توقاەۆ دەنساۋلىق ساقتاۋ ماسەلەلەرىنە ەرەكشە نازار اۋداردى», دەدى ول.
پرەزيدەنت كەلەسى جىلدان باستاپ اۋىل تۇرعىندارىنىڭ قاجەتتىلىكتەرىنە باعىتتالعان ۇلتتىق جوبانى ىسكە اسىرۋدى باستاۋ تۋرالى شەشىم قابىلدانعانىن اتاپ ءوتتى.
«ەكى جىل ىشىندە قازىرگى كەزدە مەديتسينالىق مەكەمەسى جوق 650 اۋىلدا مەديتسينالىق جانە فەلدشەرلىك-اكۋشەرلىك پۋنكتتەر سالىنىپ, تولىقتاي جابدىقتالادى. وسىلايشا مەملەكەت ميلليوننان اسا ازاماتىمىزدى العاشقى مەديتسينالىق-سانيتاريالىق كومەكپەن قامتاماسىز ەتەدى. بۇل ءتورت ميلليوننان اسا ازاماتىمىز ءۇشىن مەديتسينالىق قىزمەت ساپاسىن ارتتىرادى», دەدى ساۋلە قيسىقوۆا.
سونىمەن قاتار, شالعاي اۋدانداردىڭ تۇرعىندارىنىڭ بىلىكتى كومەك الۋىنا مۇمكىندىك بەرەتىن تەلەمەديتسينا داميدى. جولداۋدا دەنساۋلىق ساقتاۋ سالاسىنداعى, مەديتسينالىق قىزمەت كورسەتۋ ساپاسىن جاقسارتۋ بويىنشا ناقتى مىندەتتەر قويىلدى.