پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا مەملەكەت ميلليوننان استام ازاماتتىڭ العاشقى مەديتسينالىق-سانيتارلىق كومەككە قول جەتكىزۋىن قامتاماسىز ەتەتىنىن حابارلادى, دەپ جازادى Egemen.kz.
«مەن كەلەسى جىلدان باستاپ ەلىمىزدىڭ اۋىل تۇرعىندارىنىڭ قاجەتتىلىكتەرىنە باعىتتالعان ۇلتتىق جوبانى ىسكە اسىرۋدى باستاۋ تۋرالى شەشىم قابىلدادىم. ەكى جىل ىشىندە بۇگىندە مەديتسينالىق مەكەمەلەرى جوق 650 اۋىلدا مەديتسينالىق جانە فەلدشەرلىك-اكۋشەرلىك پۋنكتتەر سالىنىپ, تولىق جاراقتاندىرىلادى. وسىلايشا, مەملەكەت ميلليوننان استام ازاماتتىڭ العاشقى مەديتسينالىق-سانيتارلىق كومەككە قول جەتكىزۋىن قامتاماسىز ەتەدى», دەدى مەملەكەت باسشىسى بيىلعى جولداۋىندا.
پرەزيدەنتتىڭ ايتۋىنشا, ۇلتتىق جوبا اياسىندا 32 اۋداندىق اۋرۋحانا جاڭعىرتىلىپ, اۋدانارالىق كوپسالالى مەكەمەلەر بولىپ قايتا قۇرىلادى. سونداي-اق ولاردا ينسۋلت ورتالىقتارى, حيرۋرگيا, رەانيماتسيا جانە وڭالتۋ بولىمشەلەرى دە پايدا بولادى.
«بۇل ءتورت ميلليوننان استام ازامات ءۇشىن مەديتسينالىق قىزمەتتەردىڭ ساپاسىن ارتتىرۋعا مۇمكىندىك بەرەدى. بۇدان باسقا, تەلەمەديتسينا دامىتىلادى, ول شالعاي اۋدانداردىڭ تۇرعىندارىنا بىلىكتى كومەك كورسەتۋگە جول اشادى», دەپ قوستى قاسىم-جومارت توقاەۆ.