قر پارلامەنتى سەناتىنىڭ توراعاسى ماۋلەن اشىمباەۆ ءوزىنىڭ Facebook پاراقشاسىندا قازاقستان حالقىن كونستيتۋتسيا كۇنىمەن قۇتىقتادى, دەپ حابارلايدى Egemen.kz.
«بارشاڭىزدى كونستيتۋتسيا كۇنىمەن شىن جۇرەكتەن قۇتتىقتايمىن!
اتا زاڭ – تاۋەلسىزدىگىمىزدىڭ تىرەگى, مەملەكەتتىلىگىمىزدىڭ نەگىزى, ەلدىگىمىزدىڭ كەپىلى. سوندىقتان بارلىق ءىسىمىزدىڭ قۇقىقتىق باستاۋى سانالاتىن كونستيتۋتسيامىزدى ارداقتاۋ – ءار قازاقستاندىقتىڭ ابىرويلى مىندەتى.
بيىل بۇل مەرەكەنىڭ ءمانى بۇرىنعىدان ەرەكشە. مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن كونستيتۋتسيالىق رەفورما قولعا الىنىپ, حالقىمىزدىڭ باسىم بولىگىنىڭ قولداۋىمەن اتا زاڭعا ماڭىزدى وزگەرىستەر ەنگىزىلدى. سول سەبەپتى, بۇگىنگى مەرەكەنى جاڭا قازاقستاننىڭ تابان تىرەيتىن بەرىك تۇعىرى بولاتىن جاڭارتىلعان كونستيتۋتسيامەن اتاپ ءوتىپ جاتىرمىز.
كونستيتۋتسيالىق رەفورما قالىپتاسقان ساياسي-قۇقىقتىق جۇيەمىزدى ترانسفورماتسيالاۋعا نەگىز بولدى. سوعان بايلانىستى پارلامەنتتىڭ جاڭا سەسسياسىندا قولدانىستاعى زاڭنامانى وسى ىرگەلى وزگەرىستەرگە سايكەستەندىرۋ جۇمىسى قارقىندى جالعاسادى.
كونستيتۋتسيا كۇنىمەن قۇتتىقتاي وتىرىپ, ءار شاڭىراققا شاتتىق پەن باق-بەرەكە تىلەيمىن! ەلدىگىمىز باياندى بولسىن! اتا زاڭىمىز مارتەبەلى تۇعىرىنان تۇسپەسىن!», دەدى سەنات توراعاسى الەۋمەتتىك جەلىدەگى پاراقشاسىندا.