ۆەتنامنىڭ حوشيمين قالاسىندا پاراتاەكۆوندودان ازيانىڭ اشىق بىرىنشىلىگى اياقتالدى. ءتۇرلى جاس ەرەكشەلىكتەرى بويىنشا وتكەن جارىستا 15 مەملەكەتتەن كەلگەن 70-كە جۋىق سپورتشى باق سىنادى.
جەرلەستەرىمىزدىڭ اراسىنان مالىك مۇقاشەۆتىڭ ونەرىنە ءتانتى بولدىق. باتىس قازاقستان وبلىسىنىڭ ءبورلى اۋدانىندا مۇمكىندىگى شەكتەۋلى جانداردى جاتتىقتىراتىن ول ءدۇبىرلى دودالارعا ءوزى دە ءجيى قاتىسىپ, ەلگە ۇنەمى ولجالى ورالىپ ءجۇر. ماسەلەن, بىلتىر تۇركيادا وتكەن الەم چەمپيوناتىندا 80 كيلو سالماقتا سىنعا تۇسكەن مالىك جەڭىس تۇعىرىنىڭ ەڭ بيىك ساتىسىنا كوتەرىلدى. بۇل جولى دا تاەكۆوندوشى قارسىلاس شاق كەلتىرمەدى. تاعى ءبىر باس جۇلدە تانىمال سپورتشى كاميلا دوسمالوۆاعا بۇيىردى. ول 57 كيلو سالماقتا توپ جاردى.
حوشيميندە تاعى ءتورت سپورتشىمىزدىڭ التىن الۋىنا جاقسى مۇمكىندىكتەرى بولدى. الايدا اقتىق سىندا ۇتىلعان نىسانبەك ايداربەكوۆ (58 كيلو), باۋىرجان كوشەرباەۆ (63 كيلو), نۇرلان دومباەۆ (80 كيلو) جانە نىشان ءومىرالى (+80 كيلو) كۇمىس مەدالدى مويىندارىنا ءىلدى. اسا اۋىر سالماقتا ايقاسقان الىشەر گاريپوللاەۆ قولاعا قول سوزدى.
جالپى ەسەپتە يران مەن وزبەكستاندى العا جىبەرگەن قازاقستان قۇراماسى ءۇشىنشى ورىندى يەلەندى. ال مۇمكىندىگى شەكتەۋلى جاندارعا ارنالعان سپورتتىق دايارلاۋ ورتالىعىنىڭ اعا جاتتىقتىرۋشىسى نۇرجان ەسىلباەۆ چەمپيوناتتىڭ قورىتىندىسى بويىنشا ەڭ ۇزدىك باپكەرگە تيەسىلى ارنايى سىيلىقتى يەلەندى.