جاڭا وقۋ جىلى قارساڭىندا ءوڭىر پەداگوگتەرىنىڭ, دالىرەك ايتقاندا جاس مامانداردىڭ الدىنان كەسە-كولدەڭەن كەزدەسىپ وتىرعان ۇلكەن ءبىر ماسەلە بار. ول – مەكتەپكە جۇمىسقا قابىلداۋ كونكۋرسىنداعى ادىلەتسىزدىكتەر. قابىلداۋ پروتسەسىندە وقۋدى جاڭادان تامامداعان تۇلەكتەر «مۇيىزدەلىپ», تاجىريبەسى تولىسقان پەداگوگتەرگە ءمان بەرىلەدى ەكەن. ءتىپتى كەيبىر «ساقا» مۇعالىمدەر بىرنەشە مەكتەپتە جەڭىمپاز اتانىپ, جاستارعا ورىن بەرمەي وتىر.
وڭىرلىك قوعامدىق كەڭەس مۇشەسى, «قاعاندىق» قوعامدىق بىرلەستىگىنىڭ توراعاسى ەركەعالي جانعازى بۇل ماسەلەنى جۋىقتا پارلامەنت ءماجىلىسىنىڭ دەپۋتاتتارىنا جولدادى.
– كونكۋرستىق قابىلداۋ پروتسەسىنە سۇيەنسەك, تەستىلەۋدەن وتكەن جاس مامان ءوتىنىشتى سايت ارقىلى بەرەدى. مەكتەپ اكىمشىلىگى قابىلداپ الادى دا, بەكىتىلگەن تالاپتارعا سايكەس ءوتىنىش بەرۋشىنى جۇمىسقا قابىلدايدى. وسى جەردە كەيبىر ءبىلىم وردالارى جاس كادرلاردان مەيلىنشە باس تارتىپ, كوپ جىل جۇمىس ىستەگەن ساقا مۇعالىمدەردى تاڭدايتىنى بايقالىپ قالۋدا. ديپلومىن قولىنا جاڭا العان جاس ماماندا نە تاجىريبە, نە جەكە جەتىستىكتەرى جوق. وسى سەبەپتەردەن جاستار ءدال قازىر جۇمىسقا ورنالاسۋ مۇمكىندىگىنەن ايىرىلىپ وتىر. ءتىپتى زەينەتكە شىققان ارداگەر ۇستازدار دا تىزگىندى بەرگىسى كەلمەي كونكۋرسقا قاتىسىپ, جەڭىمپاز اتانادى دا, جاستار جۇمىسسىزدار ساناتىن ودان سايىن مولايتا تۇسۋدە.
تاعى ءبىر ماسەلە, ءبىر مۇعالىمنىڭ بىرنەشە مەكتەپتەگى كونكۋرسقا قاتىسۋعا مۇمكىندىگى بار. ول بارلىق جەردە جەڭىپ شىقسا, تيىسىنشە بارلىق ۆاكانسيانى يەلەنەدى دەگەن ءسوز. ال ول تۋرالى مەكتەپ باسشىلىعى تەك 1 قىركۇيەكتە عانا بىلەدى. ال بۇل كەمشىلىك مەكتەپتەردەگى مۇعالىمدەردىڭ جەتىسپەۋشىلىگىن ودان سايىن ۇلعايتادى. كونكۋرستى قايتا وتكىزگەنشە ۋاقىت وتەدى, ياعني وقۋ پروتسەسىندە ۇلكەن كەدەرگىلەر پايدا بولادى, دەيدى قوعام بەلسەندىسى.
پەداگوگتەردى مەكتەپكە قابىلداۋ ۇردىسىندەگى وسى ءبىر شيكىلىك جويىلماسا, قولىندا كۇرەكتەي ديپلومى بولا تۇرا جۇمىسقا ورنالاسا الماي جۇرگەن جاس مامانداردىڭ قاتارىن ءوسىرىپ جىبەرەتىنى ايدان انىق. قوعام وكىلدەرى بۇل ماسەلەنى تەز ارادا شەشۋدى تالاپ ەتىپ وتىر. ايتىپ وتەيىك, بۇگىندە وڭىردە 18 مىڭنان استام پەداگوگ بار. ورىس تىلىندە ءبىلىم بەرەتىن وقۋ وشاقتارىندا ورىس ءتىلى مەن ادەبيەتى, ماتەماتيكا پاندەرىنىڭ جانە باستاۋىش سىنىپتىڭ مۇعالىمدەرى جەتىسپەيدى. ال مەملەكەتتىك تىلدەگى باستاۋىش سىنىپ مۇعالىمدەرى كەرىسىنشە شامادان تىس كوپ ەكەنى بايقالادى.
ايتپاقشى, بيىل مەكتەپتەردەگى دەنە تاربيەسى مۇعالىمدەرىنىڭ ساعاتتارى دا ازايتىلىپ جاتقانى ءمالىم. جاڭاشىلدىقتىڭ كەسىرىنەن وڭىردە جۇزدەگەن ءپان مۇعالىمى قىسقارتىلىپ قالۋى دا مۇمكىن ەكەن.
پاۆلودار وبلىسى