جىلداعىداي جەرگىلىكتى مەشىتتەر «مەكتەپكە جول» اكتسياسىنا ءۇن قوسىپ, مەكتەپ جاسىنداعى بالالارعا قۋانىش سىيلاۋدا. ءماشھۇر ءجۇسىپ اتىنداعى ورتالىق مەشىتتە قايىرىمدىلىق شاراسى ۇيىمداستىرىلىپ, 200 وقۋشى مەكتەپ قۇرالدارىمەن قامتاماسىز ەتىلدى.
ساۋابى مول شارانى قمدب-نىڭ پاۆلودار وبلىسى بويىنشا وكىلدىگى جانە «زەكەت» قايىرىمدىلىق قورى كاسىپكەر ازاماتتاردىڭ ۇيىتقى بولۋىمەن قولعا العان ەكەن. قايىرىمدىلىق اكتسياسىنا جەر-جەردەن قالتالى ازاماتتار ءۇن قوستى. ءماشھۇر ءجۇسىپ اتىنداعى ورتالىق مەشىتتە وتكەن ارنايى شاراعا وبلىستىڭ باس يمامى جولداس بەرتىمۇراتوۆ باستاعان ءدىن قىزمەتكەرلەرى جانە «قامقور – شاراپات» ءبولىمىنىڭ قىزمەتشىلەرى قاتىستى.
– بالالارعا قۋانىش سىيلاۋ دا باقىت! اللانىڭ قالاۋىمەن بيىل دا مەكتەپكە باراتىن بالالاردى قولداپ, كاسىپكەرلەرىمىز, مۇددەلى ازاماتتار ءوز كومەكتەرىن كورسەتۋدە. جاقسىلىقتا جارىسقان مۇسىلمان جاماعاتىنىڭ قايىرىمدىلىق ۇلگىسى وزگە دە اعايىنعا ونەگە بولسا ەكەن دەيمىز. ىزگىلىكتى ءىس الداعى ايلاردا دا جالعاسادى, – دەپ اتاپ ءوتتى وبلىستىڭ باس يمامى جولداس قوسپاق ۇلى.
جالپى, قايىرىمدىلىق اكتسياسى اياسىندا بۇل كۇنى جاعدايى تومەن, كوپبالالى وتباسىندا تۇراتىن 100 ۇل مەن 100 قىزعا سومكە, داپتەر, قالام, سىزعىش, تسيركۋل, سۋرەت داپتەر, قالام ۇشتاعىش, جەلىم, ت.ب. قۇرالدار ۇلەستىرىلدى.
ايتىپ وتەيىك, اكتسيا بۇگىندە بارلىق اۋدان-قالالاردىڭ مەشىتتەرىندە جالعاسۋدا. اققۋلى اۋدانىندا – 30, اقسۋ قالاسى بويىنشا – 31, ەرتىس اۋدانىندا – 53, باياناۋىلدا – 33 بالا, شارباقتىدا – 23, جەلەزيندە – 10, اقتوعايدا – 33, مايدا – 22, ەكىباستۇز قالاسى بويىنشا 150 بالاعا يماندىلىق وردالارىنىڭ مۇرىندىق بولۋىمەن كومەك كورسەتىلگەن. سونداي-اق «ار راحمان», «بيجان», «اقمەشىت», «ابۋ باكىر سىددىق», «ومار فارۋق» مەشىتەرى دە بەلسەنە اتسالىسۋدا.
پاۆلودار وبلىسى