ءبىر كۇندىك ۇزىلىستەن كەيىن «ۆۋەلتا» دوداسى قايتا جالعاستى. قىزعالداقتار ەلى اۋماعىندا وتكەن باسەكەلەر اياقتالعاننان كەيىن ۆەلوشاباندوزدار يسپانيانى بەتكە الدى.
پيرەنەي تۇبەگىنىڭ سولتۇستىك بەتكەيىندە ورنالاسقان ۆيكتوريا-گاسترەيس پەن لا گۋارديا ارالىعىن جالعاستىرىپ جاتقان 152,5 شاقىرىمدىق قاشىقتىقتا نيدەرلاندتىڭ Jumbo-Visma كلۋبىنىڭ ۆەلوشاباندوزى پريموج روگليچكە تەڭ كەلەر ەشكىم تابىلمادى. ونىڭ ۋاقىتى – 3 ساعات 31 مينۋت 05 سەكۋند. ودان كەيىنگى ورىنداردى دانيالىق مادس پەدەرسەن (Trek-Segafredo) مەن يسپانيالىق ەنريك ماس (Movistar) يەلەندى. «استانانىڭ» ساپىنداعى كولۋمبيالىق لەگيونەر ميگەل انحەل لوپەس 36-ساتىعا تابان تىرەدى.
جوعارىداعى جەڭىسىنىڭ ارقاسىندا 32 جاستاعى روگليچ جالپى ەسەپتە جەكە-دارا كوش باستادى. ونىڭ كورسەتكىشى – 11:50:59. ەكىنشى ورىنداعى پەدەرسەن سلوۆەنيالىق ساڭلاقتان 13 سەكۋند قالىپ كەلەدى. ءۇشىنشى ساتىعا ۇلىبريتانيالىق يتان حەيتەر (INEOS Grenadiers) جايعاستى. ال ءبىزدىڭ لوپەس ازىرشە 32-ورىندى ەنشىلەۋدە.