نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا وڭتۇستىك-شىعىس ەلدى مەكەنىنىڭ تۇرعىندارىمەن كەزدەسۋدە قانداي پروبلەمالار قوزعالعانىن ءمالىم ەتتى, دەپ حابارلايدى Egemen.kz.
«اۋداندارىمىزدىڭ, ەلدى مەكەندەرىمىزدىڭ تۇرعىندارىمەن تۇراقتى كەزدەسۋ وتكىزەمىز. سونىمەن, وڭتۇستىك-شىعىس ەلدى مەكەنىنىڭ تۇرعىندارىمەن باس قوستىق. الدىڭعى كەزدەسۋدە قالا تۇرعىندارى بىرقاتار ماسەلەنى قوزعاعان بولاتىن. قازىر ولاردىڭ باسىم بولىگى شەشىلدى, ال جۇيەلى ماسەلەلەر بويىنشا ءتيىستى جۇمىستار ءجۇرىپ جاتىر. بۇل كەزدەسۋدە كوتەرىلگەن پروبلەمالار وسى جىلدىڭ دا, 2023 جىلدىڭ دا جوسپارىنا ەنگىزىلدى.
قالا تۇرعىندارى ۇيلەردى ودان ءارى گازعا قوسۋ, اباتتاندىرۋ, ناقتىراق ايتقاندا, اباتتاندىرىلعان اۋلالار مەن قوعامدىق كەڭىستىكتەر سانىن ارتتىرۋ, كارىز, جول سالۋ, جارىقتاندىرۋ سەكىلدى ءتۇرلى پروبلەمالار بويىنشا جۇگىندى.
ماسەلەن وسىعان دەيىن ايتىلعان ماسەلەلەر بويىنشا: ينجەنەرلىك جەلىلەر قۇرىلىسىن جوبالاۋدى جۇرگىزەمىز – 30 كم سۋمەن جابدىقتاۋ جەلىسى, 15 كم تۇرمىستىق كارىز جەلىسى, 23 كم نوسەر كارىزى جەلىسى. سول سياقتى بىرنەشە كوشەنىڭ جولى سالىندى, مىسالعا قوزىباسى, بۋراباي, اقارىس, ەرتىس, جايىق, ەدىل, دەگەرىس جانە تاعى باسقا», دەپ جازدى اكىم.
ونىڭ ايتۋىنشا, وڭتۇستىك-شىعىس ەلدى مەكەنى تولىقتاي گازبەن قامتاماسىز ەتىلدى. وسى ءۇشىن 160 كم-دەن استام گاز تاراتۋ جەلىسى سالىندى. 1600-دەن استام ابونەنت گازعا قوسىلدى, تاعى 1900 ابونەنت تەحنيكالىق شارت الدى. گازعا قوسىلۋ ءۇشىن مۇقتاج جاندارعا كورسەتىلەتىن الەۋمەتتىك كومەك مولشەرىن 410 مىڭ تەڭگەگە دەيىن ۇلعايتىپ, قاجەتتى قۇجاتتار تىزبەسى ەكى ەسە قىسقارتىلدى. بۇل شارانىڭ ءبارى گازعا قوسىلعان ۇيلەردىڭ سانىن كوبەيتۋگە مۇمكىندىك بەرەدى, سول سياقتى قالا ەكولوگياسىنا, قالا تۇرعىندارىنىڭ ءومىر ءسۇرۋ ساپاسىنا وڭ اسەر ەتەدى.
«ەلدى مەكەندە 50-دەن استام كامەرا, 2 مىڭنان اسا جارىقديودتى شام (جىل سوڭىنا دەيىن تاعى 500 شام ورناتۋدى جوسپارلاپ وتىرمىز) ورناتىلدى, 3 قوعامدىق كەڭىستىك اباتتاندىرىلدى, سونداي-اق كەلەسى جىلى قوعامدىق كەڭىستىكتەرگە ارنالعان تاعى 13 ۋچاسكە جوسپارلاندى. ەلدى مەكەندەردى جۇيەلى اباتتاندىرۋ ءىسى مەملەكەت باسشىسىنىڭ تىكەلەي باقىلاۋىندا», دەدى التاي كولگىنوۆ.