2022 جىلدىڭ باسىنان بەرى پايدالانىلماي جاتقان جانە زاڭنامانى بۇزا وتىرىپ بەرىلگەن جەرلەردى مەملەكەت مەنشىگىنە قايتارۋ جونىندەگى كوميسسيانىڭ شەشىمىمەن 1 ملن 119 مىڭ گەكتار اۋىل شارۋاشىلىعى ماقساتىنداعى جەر مەملەكەت مەنشىگىنە قايتارىلعان.
اۋىل شارۋاشىلىعى مينيسترلىگىنىڭ مالىمەتى بويىنشا قازىرگى ۋاقىتتا جالپى اۋماعى 2 ملن 94 مىڭ گا جەردى پايدالانۋشىلارعا قاتىستى 724 جوسپاردان تىس تەكسەرۋ جۇرگىزىلىپ جاتىر. 698,4 مىڭ گا جەردى تەكسەرۋ بويىنشا 48 ءوتىنىش پروكۋراتۋرا ورگاندارىندا تىركەۋ ساتىسىندا تۇر. جالپى, كوميسسيا اۋماعى 7,45 ملن گا جەردە 2 584 سۋبەكتىگە قاتىستى تەكسەرۋ جۇرگىزۋدى جوسپارلاپ وتىر, ونىڭ ىشىندە ەگىستىك الاڭى – 585,2 مىڭ گا, جايىلىم جەر – 6,86 ملن گا.
ەسكە سالايىق, بيىل 9 تامىزدا پرەزيدەنت قاسىم-جومارت توقاەۆ جەر زاڭناماسىنىڭ ساقتالۋىنا تەكسەرۋ جۇرگىزۋگە ءموراتوريدىڭ كۇشىن جويۋدى كوزدەيتىن جارلىققا قول قويدى. جوعارىدا اتالعان شارالاردى ەسكەرە وتىرىپ, جىل سوڭىنا دەيىن پايدالانىلماعان جانە زاڭنامانى بۇزا وتىرىپ, بەرىلگەن اۋىل شارۋاشىلىعى ماقساتىنداعى جەرلەرىنىڭ كەم دەگەندە 5 ملن گەكتارىن مەملەكەتكە قايتارۋ كوزدەلگەن.
جەر رەسۋرستارىن باسقارۋ كوميتەتى جەردى پايدالانۋ مونيتورينگى جانە جەردىڭ پايدالانىلۋى مەن قورعالۋىن مەملەكەتتىك باقىلاۋدى جەتىلدىرۋ باسقارماسىنىڭ باسشىسى ساعادات دۇيسەنوۆتىڭ سوزىنە قاراعاندا, 2022 جىلدىڭ 1 قاڭتارىنان باستاپ جەر ۋچاسكەسىن ماجبۇرلەپ الىپ قويۋ 2 جىلدان 1 جىلعا قىسقاردى. سونداي-اق پايدالانىلماي جاتقان جەرگە سالىناتىن سالىق بۇرىن 10 ەسە ۇلعايتىلعان بولسا, قازىر 20 ەسە ارتقان.