ەلوردادا «جاستار» سارايىندا جۇمىسسىز ازاماتتار, پروباتسيا قىزمەتىنىڭ ەسەبىندە تۇرعان, باس بوستاندىعىنان ايىرۋ ورىندارىنان بوساتىلعان ادامدار جانە اليمەنت بويىنشا بورىشكەرلەر ءۇشىن جالپى قالالىق بوس ورىندار جارمەڭكەسى ءوتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
تۇرعىنداردىڭ جۇمىسقا ورنالاسۋىنا كومەكتەسۋ ماقساتىندا ۇيىمداستىرىلعان جارمەڭكەگە 50-دەن استام جۇمىس بەرۋشى قاتىستى.
جارمەڭكە جۇمىسىنا ەلوردانىڭ 54 جۇمىس بەرۋشىسى قاتىسىپ, 1300-دەن استام بوس جۇمىس ورىندارى ۇسىنىلدى. ونىڭ ىشىندە 9 مەكەمە پروباتسيا قىزمەتى ەسەبىندەگىلەر جانە جازاسىن وتەپ كەلگەن جۇمىسسىز ازاماتتارعا 197-دەن استام بوس جۇمىس ورىندارىن ۇسىندى. ءبىلىم, ساۋدا, قارجى, قۇرىلىس سالاسىنداعى مەكەمەلەر جۇمىس ىزدەپ جۇرگەن ازاماتتارعا اقپاراتتىق-ءتۇسىندىرۋ جۇمىستارىن جۇرگىزىپ, تۇيىندەمەلەرىن قابىلدادى.
جارمەڭكە ارقىلى جۇمىس تابۋعا نيەتتى ازاماتتاردىڭ بىرقاتارى ەڭبەككە ەندى ارالاساتىن جاس مامان بولسا, ەندى ءبىرى تۇرمىستىق جاعدايعا بايلانىستى جۇمىس ورنىن اۋىستىرۋدى كوزدەيدى. ەلورداعا قونىس اۋدارعان قازاق ءتىلى جانە ادەبيەتى ءپانىنىڭ مۇعالىمى التىنگۇل وڭەي ءوز ەركىمەن جۇمىس تاپپاعان سوڭ, جارمەڭكەدە جۇمىس تابۋعا ءۇمىتتى.
«مەن ارشالى اۋدانى سارىوبا ورتا مەكتەبىندە 17 جىل قازاق ءتىلى مەن ادەبيەتىنەن ساباق بەردىم. بيىل وتباسىلىق جاعدايعا بايلانىستى ەلورداعا كوشتىك, بىراق ءالى جۇمىس تاپپادىم. وسى جارمەڭكەدە بىرنەشە مەكەمەگە تۇيىندەمە تاپسىردىم, جاقسى حابار كۇتەمىن», دەيدى مۇعالىم ا.وڭەي.
جارمەڭكەدە جۇمىس بەرۋشىلەر قاتارىندا قالالىق حالىققا قىزمەت كورسەتۋ ورتالىعى دا بولدى. ورتالىق 5 باعىت بويىنشا بوس جۇمىس ورىندارىن ۇسىندى. «ازاماتتارعا ارنالعان ۇكىمەت» مەملەكەتتىك كورپوراتسياسى» نۇر-سۇلتان قالالىق فيليالىنىڭ وكىلى ەلورداداعى ورتالىقتارعا 50 ادام جەتىسپەيتىنىن اتاپ ءوتتى.
«ەلوردادا 9 حقكو بار. قازىر قىزمەت كورسەتۋ ورتالىعىنا جۇمىسقا كىرۋ جەڭىلدەدى. ۇمىتكەرلەر پسيحولوگيالىق تەست تاپسىرمايدى, جۇمىسقا اڭگىمەلەسۋ ارقىلى قابىلدانادى. مۇمكىندىگى شەكتەۋلى ازاماتتاردى دا جۇمىسقا الۋ جاعى ويلاستىرىلعان. بۇگىنگى جارمەڭكەدە تۇيىندەمەلەر كوپ ءتۇستى, ءبىز ولارمەن تانىسىپ, بارلىق تالاپقا سايكەس كەلەتىن ازاماتتاردى جۇمىسقا قابىلدايمىز», دەيدى باقتيار الياقپاروۆ.
جارمەڭكەگە نۇر-سۇلتان قالاسى پروكۋراتۋراسى, قالالىق جۇمىسپەن قامتۋ جانە الەۋمەتتىك قورعاۋ باسقارماسى, ادىلەت دەپارتامەنتى جانە قىلمىستىق-اتقارۋ جۇيەسى دەپارتامەنتىنىڭ وكىلدەرى, سونداي-اق, «استانا-تەپلوترانزيت» اق, «Green tal» جشس, «مەيرىم-م» جشس, «ەلەكتروۆوز قۇراستىرۋ زاۋىتى» جشس, «باسقارۋ كوللەدجى» جشس, نۇر-سۇلتان قالاسى اكىمدىگىنىڭ شجق مكك «سەرۆيس جانە تۋريزم كوللەدجى», «جوعارى مەديتسينالىق كوللەدجى» شجق مكك جانە باسقالار قاتىستى.
ايتا كەتەيىك, نۇر-سۇلتان قالاسىندا جىلدىڭ سوڭىنا دەيىن 28 مىڭ جاڭا جۇمىس ورنى قۇرىلادى. بوس جۇمىس ورىندارى جارمەڭكەسىنىڭ ماقساتى-جۇمىس بەرۋشىلەر مالىمدەگەن ازاماتتاردى بوس جۇمىس ورىندارىنا جۇمىسقا ورنالاستىرۋ. بۇگىنگى جالپىقالالىق جارمەڭكەگە 450-گە جۋىق جۇمىس ىزدەۋشى قاتىستى. قالالىق حالىقتى جۇمىسپەن قامتۋ ورتالىعى مالىمەتىنشە جىل سوڭىنا دەيىن ءالى وسىنداي 8 بوس جۇمىس ورىندار جارمەڭكەسى وتەدى.