ەنەرگەتيكا ۆيتسە-ءمينيسترى جاندوس نۇرماعانبەتوۆ قازاقستان ەلەكتر ەنەرگياسىنىڭ تاپشىلىعىنا تاپ بولۋى مۇمكىن ەكەنىن ايتتى, دەپ حابارلايدى Egemen.kz.
«تۇتىنۋ سەرپىنى بويىنشا ءبىز 1-1,5 ملرد كۆتساع دەيىنگى كولەمدە ەلەكتر ەنەرگياسىنىڭ تاپشىلىعىن بولجاي الامىز, بۇل ورتاشا العاندا 300 مۆت قۇراۋى مۇمكىن», دەدى ەنەرگەتيكا ۆيتسە-ءمينيسترى جاندوس نۇرماعانبەتوۆ.
ونىڭ ايتۋىنشا, بۇعان دەيىن قازاقستان قىرعىزستانداعى توقتوعۇل سۋ قويماسىنان ەلدىڭ وڭتۇستىك وڭىرلەرىنە سۋ جەتكىزۋ بويىنشا كەلىسسوزدەر جۇرگىزگەن بولاتىن, ءوز كەزەگىندە قازاقستاندىق تاراپ جىلىتۋ ماۋسىمى بارىسىندا قىرعىزستانعا ەلەكتر ەنەرگياسىن جەتكىزەدى.
«ەگەر قىرعىزستانعا جەتكىزۋ جالعاساتىن بولسا, وندا بۇل ەلەكتر ەنەرگياسىن 1-1, 5 ملرد كۆتس كولەمىندە اۋىستىرۋ قاجەت بولادى. بارلىعى ءبىزدىڭ قازاقستاندىق ستانتسيالاردىڭ قىسقى كەزەڭدەگى تەحنيكالىق جاي-كۇيىنە بايلانىستى», دەدى ول.
ول تۇتىنۋشىلاردى قانداي دا ءبىر جولمەن قامتاماسىز ەتۋ بەيىندى مينيسترلىكتىڭ, جۇيەلىك وپەراتوردىڭ مىندەتى ەكەنىن جانە بارلىق تۇتىنۋشىلار ەلەكتر ەنەرگياسىمەن تولىق كولەمدە قامتاماسىز ەتىلەتىنىن ايتتى.
«ەگەر بىزدە تاپشى كولەمدەر بولجاناتىن بولسا, وندا ەلەكتر ەنەرگياسىن قازاقستانعا جەتكىزۋ مۇمكىندىگى بار ەلدەردەن (بۇل رەسەي, وزبەكستان, قىرعىزستان) جۇزەگە اسىرىلادى», دەپ قوستى جاندوس نۇرماعانبەتوۆ.