وتاندىق قورعانىس سالاسىنىڭ كوشباسشى كاسىپورىنى سانالاتىن ورالداعى «زەنيت» زاۋىتى ۇلى جەڭىستىڭ 69 جىلدىعى جانە قازاقستان قارۋلى كۇشتەرىنىڭ 22 جىلدىعى قارساڭىندا كەزەكتى تاماشا تابىسقا قول جەتكىزدى. اتاپ ايتقاندا «سارىارقا» دەگەن ايبىندى اتاۋعا يە بولعان كەزەكتى كەمەنى سۋعا ءتۇسىردى.
بۇل تاريحى سوناۋ 41-ءدىڭ وتتى جىلدارىنان باستالعان كاسىپورىننىڭ كونۆەيەرىنەن شىققان 21-ءشى كورابل. كەمەگە «سارىارقا» اتاۋى بەرىلۋى دە تەگىن ەمەس. ويتكەنى, تاۋەلسىز ەلىمىزدىڭ استاناسى وسى جازيرا جازىق سارىارقانىڭ سامالدى توسىندە ورنالاسقان. ولاي بولسا, قارت كاسپيگە باعىت ۇستاعان كەمەنىڭ عۇمىرى دا ۇزاق, كەدىر-بۇدىرسىز, تەپ-تەگىس بولارىنا سەنگىمىز كەلەدى.
كورابلدى تەڭىزگە شىعارىپ سالۋ سالتاناتىنا حالىق كوپ جينالدى. اسكەري-تەڭىز كۇشتەرى باسشىلىعى, وبلىس اكىمدىگى وكىلدەرى تۇگەل وسى جەردەن تابىلدى. اسىرەسە, جاڭا كەمەگە جان بىتىرگەن زاۋىت جۇمىسشىلارىنىڭ قۋانىشىندا شەك بولمادى. مۇنى ولاردىڭ بال-بۇل جانعان جۇزدەرىنەن, بۇل ءبىزدىڭ ءونىمىمىز دەپ ماقتانىشپەن كەۋدە كەرە ايتقان اڭگىمەلەرىنەن ايقىن اڭعاردىق.
قورعانىس مينيسترلىگىنىڭ تاپسىرىسىمەن جاسالعان ءۇشىنشى كەمەگە اسەم استانامىز ورنالاسقان جازيرالى ءوڭىردىڭ اتاۋىن بەرۋىمىز تەگىن ەمەس. سەبەبى, سارىارقا وتانىمىزدىڭ جۇرەگى, بارشا حالىقتىڭ سۇيىكتى ولكەسى. الداعى ۋاقىتتا كەمەمەن ەلىمىزدىڭ تەڭىزدەگى شەكاراسىن كۇزەتەتىن ساربازدارىمىزعا بۇل ۇلكەن كومەكشى بولادى. سول ءۇشىن زاۋىتتىڭ ۇجىمى كۇنى-ءتۇنى ايانباستان ەڭبەك ەتتى. مىنە, ناتيجەسى الدارىڭىزدا تۇر. ءسات ساپار, «سارىارقا»!», – دەدى زاۋىت ديرەكتورى ۆياچەسلاۆ ۆاليەۆ سالتاناتتى راسىمدە سويلەگەن سوزىندە.
ەكيپاجى 23 ادامنان تۇراتىن, سالماعى 250 توننالىق كورابلدىڭ قۇرىلىسى ءۇش جىلعا سوزىلىپتى. «زەنيت» زاۋىتىندا سوڭعى جىلدارى جۇمىسشىلار سانى قىسقارعان جوق. ءوندىرىس وشاعىن الەمدىك قارجى داعدارىسى كەزىندەگى قيىندىقتاردان مەملەكەتتەن بولىنگەن قاراجات قۇتقارىپ قالدى. بۇگىندە كەمەنى قۇراستىرۋعا زاۋىتتاعى 950 جۇمىسشى اتسالىسۋدا. ساعيدا بالاجانوۆا وسى ءوندىرىس ورنىندا 38 جىلدان بەرى بەل جازباي ەڭبەك ەتىپ كەلەدى. قازىر جاسى الپىسقا تاياسا دا, ءوز كاسىبىنەن شارشاعان ەمەس. ول كەمەگە قاجەتتى رەزينالاردى دايىندايدى. ونىڭ ايتۋىنشا, ءبىر سۋ كولىگىنە شامامەن ءتورت توننادان استام رەزەڭكە بالقىتىلىپ, ءپىسىرىلىپ كەسىلەدى. اتالمىش ماتەريال شيكىزات قالپىندا كەلەتىندىكتەن, دايىن ونىمگە دەيىنگى بىرنەشە كەزەڭنىڭ جۇمىسىن ءوزى اتقارادى.
ساعيدا «ەڭبەك ارداگەرى» مەدالىمەن ماراپاتتالعان. زاۋىتتا تابان اۋدارماي ەڭبەك ەتكەنىنىڭ ارقاسىندا ءۇش بولمەلى پاتەر الىپتى. «مەنىڭ جۇمىس جاسايتىن ورنىم زاۋىتتاعى ەڭ ىستىق تسەح سانالادى. جۇمىس ءار اپتاعا جوسپارلانادى. دەر كەزىندە ورىنداۋ قاجەت. ولاي بولماسا, مەجەلى ۋاقىتتا كەمەلەر سۋعا تۇسپەي قالۋى ىقتيمال. ماسەلەن, ءبىر كولەمدەگى رەزەڭكە 30-40 مينۋتتا پىسىرىلەدى. ۋاقىتىمەن قاداعالاپ وتىرۋ كەرەك. باسىندا 17 كىسى وسى جۇمىستى اتقاردىق. كەيىن 90-جىلدارداعى توقىراۋ كەزەڭىندە قىسقارتۋ بولىپ, جالعىز ءوزىم قالدىم. جۇمىستىڭ اۋىر ەكەنى راس. دەسەك تە, «الما ءپىس, اۋزىما ءتۇستىڭ» زامانى ءوتتى. تەر توگىپ, ادال ەڭبەك ەتكەن ادام عانا مۇراتىنا جەتەدى», – دەيدى ەكى ۇلىنان قوس نەمەرە ءسۇيىپ وتىرعان ارداقتى اجە.
«زەنيتتە» تەك كەمە جاساۋ ءىسى عانا ەمەس, سۋ كولىكتەرىن قايتا ءجوندەۋ جۇمىستارى دا قولعا الىنعان. مامانداردىڭ ايتۋىنشا, مۇنداي جۇمىستار تەك جاڭا كەمە سۋعا تۇسكەننەن سوڭ عانا اتقارىلادى. وسىلايشا, بۇرىنىراق وزدەرى جاساعان ونىمدەرىن جاڭارتىپ, قىزمەتكە قايتا جىبەرەدى. كاسىپورىن الەمدىك كەمە جاساۋ سالاسىنداعى ساپا ستاندارتتارىنا جاۋاپ بەرەدى. وتكەن جىلى «زەنيت» زاۋىتى «پارىز» بايقاۋىنىڭ جەڭىمپازى اتاندى. جەكە كاسىپكەرلىك سۋبەكتىلەرىندەگى الەۋمەتتىك ماسەلەلەردى شەشۋ مەن ىسكەرلىك ارىپتەستىكتى نىعايتۋ جانە ءتيىمدى كەلىسىمدەرگە تۇرۋدىڭ اياسىن كەڭەيتۋ ماقساتىن كوزدەگەن سول رەسپۋبليكالىق بايقاۋدا «ۇزدىك ۇجىمدىق كەلىسىمشارت» اتالىمى بويىنشا توپ جارعان كاسىپورىن استانا قالاسىندا وزگە دە ۇزدىكتەرمەن بىرگە ماراپاتتالدى.
تەمىر قۇسايىن,
«ەگەمەن قازاقستان».
باتىس قازاقستان وبلىسى.
سۋرەتتەردى تۇسىرگەن رافحات حالەلوۆ.