سولتۇستىك قازاقستان وبلىسىنىڭ ءبىلىم بەرۋ ۇيىمدارىندا 600-گە جۋىق بوس ورىن بار, دەپ حابارلايدى Egemen.kz.
ءبىلىم باسقارماسىنىڭ ءباسپاسوز قىزمەتى حابارلاعانداي, مۇعالىمدەردىڭ زەينەتكەرلىككە شىعۋىنا بايلانىستى بوس ورىندار پايدا بولدى. وقۋ جىلىنىڭ قورىتىندىسى بويىنشا وبلىس مەكتەپتەرىندە زەينەت جاسىنداعى 418 مۇعالىم جۇمىس ىستەدى.
«400-دەن استام جاس ماماندى قابىلداۋ جوسپارلانۋدا. ونىڭ 75 پايىزى اۋىلدى جەرگە بارادى. 1 قىركۇيەكتەن باستاپ وبلىس اكىمىنىڭ گرانتى ەسەبىنەن ءبىلىم العان 36 تۇلەك جۇمىسقا كىرىسەدى. كەلىسىمشارتقا سايكەس, ولار وبلىستاعى ءبىلىم بەرۋ ۇيىمدارىندا كەمىندە ءۇش جىل جۇمىس ىستەۋى كەرەك. 472 مەكتەپتىڭ 75 پايىزى شاعىن مەكتەپ. بۇل جەردە ساباقتاس پاندەر (حيميا-بيولوگيا, فيزيكا-ماتەماتيكا, ماتەماتيكا-ينفورماتيكا جانە ت.ب.) بويىنشا بىلىكتىلىگى بار وقىتۋشىلار قاجەت», دەلىنگەن ءباسپاسوز قىزمەتىندە.
سونداي-اق اۋىل مەكتەپتەرىنە جۇمىسقا كەلگەن جاس ماماندار 100 اەك (300 مىڭ تەڭگەدەن استام) كولەمىندە كوتەرمە جاردەماقى جانە 1500 اەك (4,7 ملن استام) كولەمىندە تۇرعىن ءۇي ساتىپ الۋعا بيۋدجەتتىك نەسيە الا الادى.