الماتى وبلىسىندا اباي كۇنىن اتاپ ءوتۋ اپتا بويىنا جالعاسپاق. ۇلى اقىننىڭ تۋعان كۇنىندە باستاۋ العان مادەني ءىس-شارالار قاتارىندا «اباي اندەرى» اتتى «ۇشقوڭىر» فولكلورلى-ەتنوگرافيالىق ءانسامبلىنىڭ كونتسەرتى, «ۇمبەتالى جىرلارىنداعى – اباي بەينەسى» اتتى ادەبي-تانىمدىق جيىن, ء«حانتاڭىرى» حالىق تەاترىنىڭ «تەلعارا» فيلم-سپەكتاكلىنىڭ قويىلىمى جانە «اباي – جىرشى, ۇلى اقىنى ەلىمنىڭ» اتتى پوەزيا كەشى بار.
ال ءدال اباي كۇنى مەرەكەسىنە وراي تالعار اۋدانىنىڭ جاڭالىق اۋىلىنداعى «اشتىق جانە ساياسي قۋعىن-سۇرگىن قۇرباندارىنا» ارنالعان مۋزەيدە «ابايدىڭ اقىن ۇلدارى» اتتى كىتاپتىڭ تۇساۋكەسەرى ءوتتى. جيىندا ابايدىڭ قۋعىن-سۇرگىنگە ۇشىراعان ۇرپاقتارى جايىندا كوپشىلىككە بەلگىسىز مالىمەتتەردەن سىر شەرتىلدى. وسى ءىس-شارادا «ابايدىڭ اقىن ۇلدارى» اتتى ەڭبەكتىڭ تۇساۋى كەسىلىپ, وقىرمانعا جول تارتتى. كىتاپتا دالا دانىشپانىنىڭ تالانتتى ۇلدارى اقىلباي, ماعاۋيا جانە تۋراعۇل جانە نەمەرەسى اۋباكىر اقىلباي ۇلى جايلى زەرتتەۋلەر زەردەلەنگەن. كىتاپ اۆتورى – بەلگىلى ابايتانۋشى, جازۋشى بولات جۇنىسبەكوۆ.
– ابايدىڭ تۇڭعىشى اقىلباي مەن ماعاۋيا اتى ايگىلى ءبىرتالاي كوركەم داستانداردى جازعان. ال تۋراعۇل قارا ءسوزدىڭ حاس شەبەرى بولعان. بۇدان بولەك اۋدارماشىلىعى دا ءبىر توبە. نەمەرەسى اۋباكىردىڭ ولەڭدەرىندە اباي ۇلگىسى سايراپ جاتىر. ول ساتيرالىق ولەڭدەرىمەن بىرگە تاريحي شىعارمالارعا بەت بۇرىپ, كولەمدى داستاندار جازعان. وكىنىشكە قاراي, كەڭەستىك كەرى ساياساتتىڭ تاس قۇرساۋى كەمەڭگەر ۇرپاقتارىن دا اينالىپ وتپەگەن. ال كىتاپتىڭ تۇساۋكەسەرىنىڭ مىنا قۋعىن-سۇرگىن قۇرباندارىنا ارنالعان مۋزەيدە ءوتۋى دە تەگىن ەمەس. مەن بىلەتىن ابايدىڭ نەمەرە ءىنىسى شاكارىمنەن باستاپ, 14 ۇرپاعى قۋعىن كورگەن. قىسقاسى, كەڭەس وكىمەتى اباي ۇرپاقتارىنا وڭ قاباق تانىتپاعان. ال ەندى بۇگىنگى جاستار اباي ارمانداعانداي ءبىلىمدى, بىلىكتى بولۋى كەرەك قوي», – دەيدى كىتاپ اۆتورى ب.جۇنىسبەكوۆ.
الماتى وبلىسى