وڭدەۋ ونەركاسىبىندە ءوسىم بار

الدىن الا دەرەككە سۇيەنسەك, قاڭتار–ناۋرىز ايلارىنىڭ قورىتىندىسىندا وڭدەۋ ونەر­كاسىبىندە 6% دەڭگەيىندە ءوسىم بولۋعا ءتيىس. ۇلتتىق ستاتيستيكا بيۋروسىنىڭ اقپاراتىنا سايكەس بىرقاتار سالادا تۇراقتى وڭ ديناميكا ساقتالىپ وتىر. ماسەلەن, جەڭىل ونەركاسىپ – 156,4%, دايىن مە­­تالل بۇيىمى – 131,4%, جيھاز ءوندىرىسى – 127,6%, قۇرىلىس ماتەريالى ءوندىرىسى – 127,4%, ماشينا جاساۋ – 115,5%.

كولىك مينيسترلىگىنىڭ حابارلاۋىنشا, ەسەپتىك كەزەڭدە كولىك سالاسىنىڭ ءوسۋى 109% دەڭگەيىندە دەپ باعالانعان. كورسەتىلگەن قىزمەتتىڭ جالپى كولەمى – 2,8 ترلن تەڭگە. بۇل وتكەن جىلعىدان 14,3% جوعارى.

وڭ ديناميكا تاسىمالداۋ كولەمىنىڭ ۇلعايۋى ەسەبىنەن قامتاماسىز ەتىلگەن. وسىلايشا, جالپى جۇك تاسىمالداۋ كولەمى 7,9%, جولاۋشىلاردى بار­لىق كولىك تۇرىمەن تاسىمالداۋ 11,0%-عا دەيىن ءوستى. جۇك اينالىمى 153,7 ملرد توننا-شاقىرىمعا, جولاۋشىلار اينالىمى 22,8 ملرد جولاۋشى-شاقىرىمعا جەتتى.

جەدەل دەرەكتەرگە سايكەس بيىلعى ءۇش ايدا جۇكتى تەمىر­جول كولىگىمەن تاسىمالداۋ كولەمى 78,3 ملن توننا بولعان. بۇل بىلتىرعى سايكەس كەزەڭنەن 3,6% ارتىق. تاسىمالداردى ساناتتارعا ءبولىپ قاراستىرساق, ەل ىشىندەگى تاسىمال 40,8 ملن توننا, ەكسپورت 22,8 ملن توننا, يمپورت 5,6 ملن توننا, ترانزيت 9,1 ملن توننانى قۇرادى.

ەكسپورت قۇرىلىمىندا كومىر, استىق, تىڭايتقىش, قۇرىلىسقا قاتىستى جۇكتەر, قارا مەتالل, سونداي-اق باسقا دا جۇك (ونىڭ ىشىندە قۇراما جەم, وسىمدىك مايى, اسبەست) تاسىمالىنىڭ وسكەنى بايقالادى. سونىمەن قاتار رەس­پۋبليكا ىشىندەگى قاتىناستا كومىر, مۇناي ءونىمى, استىق, حيميكات تاسىمالى ارتقان.

وتىرىستى قورىتىندى­لاي كەلە, سەرىك جۇمان­عارين سالالىق مەملەكەتتىك ورگاندارعا ەكونوميكالىق ءوسىمنىڭ قوسىمشا رەزەرۆىن انىقتاۋدى, ونىڭ ىشىندە مەملەكەتتىك قولداۋ قۇرالىن پايدالانۋ جونىندەگى جۇمىستى جانداندىرۋدى تاپسىردى.

«بىزگە قوسىمشا ءونىم شىعارۋ نەمەسە جاڭا تۇرعىن ءۇيدى پايدالانۋعا بەرۋ ارقىلى بولسا دا ءوندىرىس پەن قىزمەت كولەمىن ناقتى ۇلعايتۋ قاجەت. كەرەك بولعان جاعدايدا مەملەكەت مۇنداي باستامالاردى, ونىڭ ىشىندە, سۋبسيديالاۋ تەتىگى ارقىلى دا قولداۋعا دايىن», دەدى ۆيتسە-پرەمەر.