قوعامنىڭ كۇندەلىكتى تىنىس-تىرشىلىگى كوزگە كورىنە بەرمەيتىن, بىراق ۇزدىكسىز اتقارىلاتىن ەڭبەكتىڭ ارقاسىندا العا جىلجيدى. ءوندىرىس سالاسىندا ماڭداي تەرىن توگىپ, ناقتى ناتيجەمەن ولشەنەتىن جۇمىستى ابىرويمەن اتقارىپ جۇرگەن ازاماتتار – ەل دامۋىنىڭ بەرىك تىرەگى. سولاردىڭ ءبىرى – «وسكەمەن جەو» جشس ورتالىقتاندىرىلعان جوندەۋ تسەحىندا حيميالىق سۋ تازالاۋ شەبەرى قىزمەتىن اتقاراتىن دارحان مۇساباەۆ.
بيىل جىل باسىندا «ەرەن ەڭبەگى ءۇشىن» مەدالىمەن ماراپاتتالعان دارحان ساعداش ۇلى قاراعاندى قالاسىندا دۇنيەگە كەلگەنمەن, بالالىق شاعى شىعىس قازاقستان وڭىرىندە ءوتتى. 1994 جىلى ۇلكەن نارىن اۋدانىنا قاراستى نوۆو-بەريوزوۆكا ورتا مەكتەبىنىڭ تابالدىرىعىن اتتاپ, 2004 جىلى وسى ءبىلىم ورداسىن اياقتادى. ەرتە كەزدەن تەحنيكالىق پاندەرگە بەيىمى بار ول بولاشاق كاسىبىن سانالى تۇردە تاڭدادى. سول جىلى د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ جىلۋ-ەلەكترمەن قامتاماسىز ەتۋ فاكۋلتەتىنە وقۋعا ءتۇسىپ, «جىلۋ ەنەرگەتيكاسى» ماماندىعىن الدى. ۋنيۆەرسيتەتتە العان تەوريالىق دايارلىق پەن وندىرىستىك ويلاۋ ماشىعى ونىڭ كەيىنگى ەڭبەك جولىنا بەرىك نەگىز قالادى. 2008 جىلى جوعارى وقۋ ورنىن تامامداعان سوڭ, جاس مامان ەڭبەك جولىن «وسكەمەن جەو»-دا باستادى.
العاشقى جىلدارى ورتالىقتاندىرىلعان جوندەۋ تسەحىندا تەرمو وقشاۋلاۋشى, وتقا توزىمدەۋشى بولىپ ەڭبەك ەتتى. قازاندىق اگرەگاتتارى مەن قۇبىر جۇيەلەرىندەگى جىلۋ وقشاۋلاۋ جۇمىسى ستانسا تيىمدىلىگىنە تىكەلەي اسەر ەتەتىن جاۋاپتى ۋچاسكە سانالادى. دارحان ساعداش ۇلى وزىنە جۇكتەلگەن مىندەتتەردى تياناقتىلىقپەن ورىنداپ, تەحنولوگيالىق ءتارتىپتى قاتاڭ ساقتايتىن مامان رەتىندە قالىپتاستى. اتقارىلعان جۇمىس جابدىقتاردىڭ سەنىمدىلىگىن ارتتىرىپ, جىلۋ شىعىنىن ازايتۋعا مۇمكىندىك بەردى.
«جۇمىسقا ابدەن توسەلىپ الدىق. سونىڭ وزىندە ءار قيمىلىمىز وتە جاۋاپتى. جىلۋ جۇيەسى سىرت كوزگە وڭاي كورىنگەنىمەن, وتە كۇردەلى ۇدەرىس. مۇنداعى مامانداردىڭ قاي-قايسىسى دا ءوز ءىسىنىڭ ناعىز شەبەرى», دەيدى دارحان.
قىزمەت بابىندا ساتىلاپ وسكەن مامان 2014 جىلدان جابدىقتاردى پايدالانۋ, جوندەۋ جونىندەگى تەحنيك قىزمەتىن اتقاردى. ستانسانىڭ نەگىزگى تەحنولوگيالىق جۇيەلەرىنىڭ تۇراقتى جۇمىسىن قامتاماسىز ەتۋگە ەلەۋلى ۇلەس قوستى. وندىرىستىك ۇدەرىستەردى تەرەڭ ءتۇسىنۋى مەن تاجىريبەگە سۇيەنگەن شەشىمدەرى ونىڭ كاسىبي دەڭگەيىن بەكەمدەي ءتۇستى. ءسويتىپ, 2023 جىلعى تامىزدا حيميالىق سۋ تازالاۋ شەبەرى لاۋازىمىنا اۋىستىرىلدى. قىسقا مەرزىم ىشىندە جاڭا باعىتتاعى جۇمىستى جۇيەلەپ, ۇجىم قىزمەتىن ءتيىمدى ۇيىمداستىرا ءبىلدى. حيميالىق سۋ تازالاۋ – جىلۋ ەلەكتر ورتالىعى جۇمىسىنداعى نەگىزگى بۋىنداردىڭ ءبىرى. سۋ ساپاسىنا قويىلاتىن تالاپتاردىڭ ساقتالۋى جابدىقتاردىڭ ۇزاق ءارى اپاتسىز قىزمەت ەتۋىن قامتاماسىز ەتەدى. وسى جاۋاپكەرشىلىكتى تەرەڭ سەزىنەتىن مامان وندىرىستىك ءتارتىپ پەن قاۋىپسىزدىك تالاپتارىنا ايرىقشا ءمان بەرەدى.
دارحان ساعداش ۇلى ۇنەمى ءوندىرىس تيىمدىلىگىن ارتتىرۋعا باعىتتالعان ۇسىنىسىمەن ەرەكشەلەنەدى. تەحنولوگيالىق ۇدەرىستەردى جەتىلدىرۋ, رەسۋرستاردى ۇتىمدى پايدالانۋ جونىندەگى باستامالارى ستانسانىڭ پايدالانۋ شىعىندارىن تومەندەتۋگە, تەحنيكالىق سەنىمدىلىگىن ارتتىرۋعا ىقپال ەتتى.
ەڭبەك ادامىنا ءتان تاعى ءبىر قىرى – كەيىنگى بۋىنعا باعىت-باعدار بەرۋ. ول جاس مامانداردى باۋلىپ, ولاردىڭ بويىندا وندىرىستىك مادەنيەت پەن جاۋاپكەرشىلىك قاعيداتىن قالىپتاستىرۋعا ەرەكشە كوڭىل بولەدى. ۇجىمدى ۇيىمداستىرا ءبىلۋى, تالاپ پەن ادىلدىكتى ۇشتاستىرۋىنىڭ ارقاسىندا ارىپتەستەرى اراسىندا بەدەلگە, سىي-قۇرمەتكە يە. بۇگىندە دارحان ءوز ىسىنە ادال, ءوندىرىستىڭ جاۋاپتى ۋچاسكەسىندە تاباندى ەڭبەك ەتىپ جۇرگەن تاجىريبەلى مامان. وسىنداي ازاماتتاردىڭ ەڭبەگى ارقىلى ەل ەنەرگەتيكاسى دامىپ, قوعامنىڭ تۇراقتى تىرشىلىگى قامتاماسىز ەتىلىپ وتىر.
وسكەمەن