روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى «ەل بىرلىگى - جاڭا قازاقستان» اتتى جاڭا جوبانى باستايتىنىن ءمالىم ەتتى. جوبا اياسىندا ەلىمىزدەگى باستى كونتسەرت ۇيىمىنىڭ سوليستەرى وسى جىلى اباي, شىعىس قازاقستان, ۇلىتاۋ, جەتىسۋ, تۇركىستان, جامبىل وبلىستارىنىڭ اۋداندارى مەن مونوقالالارىندا كونتسەرتتەر بەرەدى, دەپ حابارلايدى Egemen.kz.
«ەل بىرلىگى - جاڭا قازاقستان» جوباسى 2022-2025 جىلدار ارالىعىندا كەزەڭ-كەزەڭمەن ىسكە اسىرىلادى. جوبانىڭ ماقساتى - ءوڭىر تۇرعىندارىنا مادەني قۇندىلىقتاردىڭ قولجەتىمدىلىگىن قامتاماسىز ەتۋ, وڭىرلەردەگى شىعارماشىلىق ۇجىمدار مەن ارتيستەردى قولداۋ, ەلىمىزدىڭ ۇلتتىق قۇندىلىقتارىن دارىپتەۋ.
«مەملەكەت باسشىسىنىڭ 2022 جىلعى ناۋرىزداعى قازاقستان حالقىنا جولداۋىندا اتاپ وتكەندەي, الاش قوزعالىسىنىڭ ورتالىعى بولعان اباي وبلىسىنىڭ ورتالىعى سەمەي قالاسى, حالقىمىزدىڭ قانشاما ۇلى تۇلعاسى دۇنيەگە كەلگەن كيەلى ءوڭىردى جاڭعىرتۋ ەكونوميكالىق قانا ەمەس, مادەني-رۋحاني ماڭىزعا يە. سوندىقتان گاسترولدىق ماۋسىمدى وسى كيەلى وڭىردەن باستاماقشىمىز», دەپ اتاپ ءوتتى روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى اقتوتى رايىمقۇلوۆا ەلوردادا وتكەن ءباسپاسوز ءماسليحاتىندا.
گاسترولدىك كونتسەرتتەردىڭ شىعارماشىلىق قۇرامىندا «قازاقكونتسەرتتىڭ» سوليستەرى: قازاقستاننىڭ حالىق ءارتىسى, قازاقستاننىڭ ەڭبەك ەرى روزا رىمباەۆا, قازاقستاننىڭ ەڭبەك سىڭىرگەن ءارتىسى ايجان نۇرماعامبەتوۆا, قازاقستاننىڭ ەڭبەك سىڭىرگەن قايراتكەرلەرى ەرلان رىسقالي, راۋشان ورازباەۆا, ازامات جىلتىركوزوۆ, مەدەت چوتاباەۆ, سالتانات احمەتوۆا, جاننا ورىنباساروۆا, قر مادەنيەت سالاسىنىڭ ۇزدىگى پەريزات تۇراروۆا, «دارىن» مەملەكەتتىك جاستار سىيلىعىنىڭ لاۋرەاتتارى اسقار مۇقيات, ارداق ەلەۋسىز, حالىقارالىق جانە رەسپۋبليكالىق بايقاۋلاردىڭ لاۋرەاتتارى دارىن قۇدايبەرگەن, الىبەك الماديەۆ, ايگەرىم التىنبەك, سالتانات مەڭدىعاليەۆا, ديدار ابدىحالىق.
«ەل بىرلىگى - جاڭا قازاقستان» جوباسىنىڭ رەسمي باستالۋى وسى جىلدىڭ تامىز ايىنا جوسپارلانعان.