ءبىرىنشى سىنىپقا قۇجات قابىلداۋ اياقتالدى

«قازاقستاندا بالالاردى ءبىرىنشى سىنىپقا قابىلداۋ ناۋقانى اياقتالدى. قۇجاتتار 1 ساۋىردەن 1 تامىزعا دەيىن قابىلداندى. وسى ۋاقىت ىشىندە قازاقستاندىقتار 400 مىڭعا جۋىق ءوتىنىش بەرگەن. بالالاردىڭ 70%-دان استامى مەملەكەتتىك تىلدە وقۋدى تاڭدادى», دەلىنگەن مينيسترلىك حابارلاماسىندا.

ءبىلىم مينيسترلىگىنىڭ مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا اتاپ وتكەندەي, وقۋ جىلىنىڭ باستالۋىنا ءبىر اي قالدى, ەندى مەكتەپتەر وقۋ پروتسەسىن دايىنداۋ مەن ۇيىمداستىرۋعا كىرىسەدى.

«بيىل مەكتەپ تابالدىرىعىن اتتاعالى تۇرعان بالالاردىڭ كوبىسى اباي, شىعىس قازاقستان, باتىس قازاقستان, قوستاناي جانە قاراعاندى وبلىستارىندا, سونداي-اق نۇر-سۇلتان, الماتى جانە شىمكەنت قالالارىندا ەكەن. بالالاردى قازاق تىلىندە وقىتاتىن سىنىپتارعا قابىلداۋدىڭ جوعارى پايىزى قىزىلوردا (89,6%), ۇلىتاۋ (86,6%), ماڭعىستاۋ (86,2%), جامبىل (80,4%) وبلىستارىندا بايقالادى», دەپ قوستى گۇلميرا كارىموۆا.

ايتا كەتسەك, وتىنىمدەردىڭ 80%-ى ەلەكتروندى تۇردە بەرىلدى.