كورنەكتى تۇركولوگ عالىم, ءتىل ءبىلىمىنىڭ تارلانى, فيلولوگيا عىلىمدارىنىڭ دوكتورى, پروفەسسور باباش ابىلقاسىموۆ دۇنيەدەن ءوتتى, دەپ حابارلايدى Egemen.kz.
باباش ابىلقاسىموۆ 1931 جىلى 2 قاراشادا اتىراۋ وبلىسى يساتاي اۋدانىندا دۇنيەگە كەلگەن.
باباش ابىلقاسىموۆتىڭ نەگىزگى عىلىمي ەڭبەكتەرى قازاق ادەبي ءتىلىنىڭ تاريحىن زەرتتەۋگە ارنالعان. ونىڭ 18 — 19 عاسىرلارداعى قازاق ادەبي ءتىلى, 19 عاسىردىڭ ەكىنشى جارتىسىنداعى ادەبي ءتىل, العاشقى قازاق گازەتتەرىنىڭ ءتىلى جونىندەگى مونوگرافيالارى قازاق ادەبي ءتىلى تاريحى ءۇشىن اسا قاجەتتى ەڭبەكتەردىڭ قاتارىنا جاتادى.
وندا «تۇركىستان ءۋالاياتى» مەن «دالا ءۋالاياتى» گازەتتەرىنىڭ, ىبىراي التىنسارين, اباي قۇنانباي ۇلى شىعارمالارىنىڭ ءتىلى تالدانىپ, ولاردىڭ قازىرگى ادەبي ءتىلىمىزدىڭ باستاۋ كوزى بولىپ سانالاتىندىعى عىلىمي تۇرعىدا دالەلدەندى. ابىلعازى ءباھادۇردىڭ «شەجىرە-ي تۇرىك» كىتابىنىڭ زەرتتەلۋ تاريحىنا شولۋ جاساپ, ونداعى تۇراقتى ءسوز تىركەستەرىن تىلدىك تۇرعىدان تالدادى. شىعارمانى كونە تۇركى تىلىنەن قازىرگى ادەبي تىلىمىزگە اۋدارىپ, جەكە كىتاپ ەتىپ شىعاردى.