كوروناۆيرۋس باتىستا كۇرت كوبەيدى

اقجايىق وڭىرىندە ەپيدەميا­لىق جاعداي الاڭداتارلىق. وڭىردە كورو­نا­­ۆيرۋسپەن سىرقاتتانۋشىلىق دەڭگەيى وتكەن ايلارمەن سالىستىرعاندا كۇرت ءوسىپ كەتكەن.

– شىلدە ايىنىڭ باسىنان بەرى وب­لىستا كوروناۆيرۋس ينفەكتسياسىن جۇق­ت­ىرۋدىڭ 207 جاعدايى تىركەلدى. ونىڭ 164-ءى – سيمپتومدى, 43-ءى – سيمپتومسىز. وتكەن ايمەن سالىستىرعاندا اۋرۋشاڭدىق دەڭگەيى 99,1%-عا ءوستى. ماۋسىم ايىندا مۇنداي ناۋقاس نەبا­رى تورتەۋ بولاتىن, – دەيدى ارمان تالعات ۇلى.

جالپى, وڭىردە جىل باسىنان بەرى كورو­ناۆيرۋس دياگنوزىمەن 9 797 ادام دارىگەرگە قارالعان. ال پاندەميا باس­تال­عا­لى بەرى وسى دەرتكە شالدىق­قان­داردىڭ سانى 50 مىڭعا (49 794) جۋىقتاپتى.

باس دارىگەردىڭ ايتۋىنشا, كوروناۆيرۋس بويىنشا ينفەكتسيالىق ستاتسيونارعا تۇسكەندەر سانى دا كۇننەن-كۇنگە ارتىپ كەلەدى. ماسەلەن, شىلدە ايىنىڭ العاشقى جارتىسىندا ينفەكتسيالىق ستاتسيونارلاردا جالعىز ناۋقاس بولسا, ارادا ءبىر اپتا وتكەندە ناۋقاس سانى 33-كە جەتىپ, ءوسىم 97 پايىزدى قۇراعان.

ارينە, دارىگەرلەر توتەنشە جاع­داي­دىڭ الدىن الۋعا تىرىسىپ جاتىر. وتكەن جىلداردىڭ تاجىريبەسى تەككە كەتپەدى. قازىردىڭ وزىندە ۆيرۋس جۇق­تىر­عان بالالارعا, جۇكتى ايەلدەرگە مەديتسينالىق كومەك كورسەتۋ ماقساتىندا وبلىستىق پەريناتالدىق ورتالىقتان, قالالىق كوپبەيىندى اۋرۋحانانىڭ بوسان­دىرۋ بولىمىنەن جانە وبلىستىق كوپ­بەيىندى بالالار اۋرۋحاناسىنان ين­فەك­تسيالىق 32 توسەكتىك ورىن ازىرلەنگەن.

جالپى, وبلىس بويىنشا قازىرگى تاڭدا 222 ينفەكتسيالىق توسەك دايىن بولسا, ول جەردە 33 ناۋقاس ەم الۋدا. ازىرگە دەرتى اسقىنىپ, رەانيماتسيا بولىمىنە تۇسكەن ناۋقاس جوق. 165 ادام امبۋ­لا­تور­لىق دەڭ­گەي­دە ەم الۋدا.

– كوروناۆيرۋس ينفەكتسياسىنا قارسى كۇرەستىڭ ەڭ ءتيىمدى ءارى سەنىمدى جولى – ۆاك­تسينالاۋ. ءدال قازىر باتىس قازاقستان وبلىسىندا PFIZER كومپانياسىنىڭ Comirnaty ۆاكتسيناسىنىڭ 1 500-گە جۋىق دوزاسى, قىتايلىق Vero CellComirnaty ۆاك­تسيناسىنىڭ 50 مىڭعا جۋىق جانە وتان­دىق QazVac ۆاكتسيناسىنىڭ 12 مىڭ­داي دوزاسى بار. ءوزىڭىز بىلەسىز, PFIZER كومپانياسىنىڭ Comirnaty جانە Sinopharm كومپانياسىنىڭ Vero Cell ۆاك­تسينالارىن دۇنيەجۇزىلىك دەن­ساۋ­لىق ساقتاۋ ۇيىمى ماقۇلداعان, – دەيدى ا.قاليبەكوۆ.

ستاتيستيكالىق دەرەكتەرگە سۇيەنسەك, وبلىستا كوروناۆيرۋسقا قارسى ۆاكتسي­نا­نىڭ ءى كومپونەنتىن – 278 186 ادام, ءىى كومپونەنتىن – 269 729 ادام العان ەكەن. بۇل بەلگىلەنگەن جوسپاردىڭ 65-67 پا­يىزى عانا.

بۇگىندە وبلىس بويىنشا Pfizer كوم­پا­نياسىنىڭ «كوميرناتي» ۆاكتسيناسىن 20 215 ادام الدى. ونىڭ ىشىندە 456-سى جۇكتى ايەلدەر, 5291-ءى بالا ەمىزەتىن ايەل­دەر, 6511-ءى جاسوسپىرىمدەر, 16-سى مۇگە­دەكتىك توبى بار جانە 7 941 باسقا سانات­تاعى ادامدار. وبلىس بويىنشا بارلىعى 102 792 ادام رەۆاكتسينالاۋدان (51,3%), 6 443 ادام قايتا رەۆاكتسينالاۋدان (42,3 %) وتكەن.

جاقىندا رەسپۋبليكالىق ۆەدومستۆو­ارا­لىق كوميسسيا ەلدەگى كوروناۆيرۋس ينفەكتسياسى بويىنشا ەپيدەميالىق احۋالدى تالقىلاعان ەدى. وسى جيىندا كوتەرىلگەن ءبىر ماسەلە رەۆاكتسينالاۋ بو­لاتىن. قازاقستان بويىنشا باتىس قازاق­ستان وبلىسى 15-ورىندا تۇر. «بۇل ايتار­لىقتاي تومەن كورسەتكىش», دەيدى وب­لىستىق دەنساۋلىق ساقتاۋ باسقار­ما­سى­نىڭ باسشىسى.

دەنساۋلىق ساقتاۋ مينيسترلىگىنىڭ اقپاراتىنا قاراساق, اۋىرعانداردىڭ 89%-ى – ۆاكتسينا الماعاندار نە ۆاكتسينا العانىنان كەيىن 6 ايدان استام ۋاقىت وتكەن ادامدار ەكەن. حالىق اراسىندا ۇجىمدىق يممۋنيتەت قالىپتاسۋى ءۇشىن دە رەۆاكتسينالاۋ دەڭگەيى 65 پايىز­دان كەم بولماۋى قاجەت. سوندىقتان مامان­دار بۇرىن ەكپە العان جانداردى قايتادان ۆاكتسينا الۋعا شاقىرىپ جاتىر.

قالىپتاسقان جاعدايعا بايلانىستى بۇگىندە وبلىستىڭ بارلىق ەمحاناسىندا ماسكا رەجىمى, فيلتر-كابينەتى مەن ءموبيلدى بريگادالار جۇمىسى قالپىنا كەلتىرىلدى. COVID-19 تارالۋىن بولدىرماۋ جانە ەپيدەميالىق احۋالدى ودان ءارى ناشارلاتپاۋ ماقساتىندا ەپيدەمياعا قارسى شارالار ەنگىزىلىپ جاتىر. اسىرەسە كوپشىلىك ورىنداردا الەۋمەتتىك ارا­قا­شىق­تىقتى ساقتاپ, مۇمكىندىگىنشە ادام كوپ جينالاتىن جەرلەرگە بارماۋ تۋرالى كەڭەس بەرىلۋدە. اۋە جانە تەمىر جول كولىكتەرىندە, حالىقارالىق اۆتوبۋستاردا جانە جابىق عيماراتتاردا ماسكا تاعۋ ۇسىنىلعان.

باتىس قازاقستان وبلىسى