ءبىز, قىزىلوردا قالاسىنداعى قاينارباەۆ كوشەسىنىڭ تۇرعىندارى كوشەمىزدەگى كىر-قوقىستان ايتارلىقتاي زارداپ شەگىپ كەلەمىز. وعان اسفالت توسەلمەگەن, اسىرەسە جاڭبىرلى كۇندەرى لاي-باتپاقتان اياق الىپ جۇرە الماي قالامىز.
الدا-جالدا بىرەۋ-مىرەۋ قاتتى سىرقاتتانىپ قالسا, جەدەل جاردەم ماشينەسى دە ءۇي الدىنا اسا جاقىنداي المايدى. ويتكەنى ويدىم-ويدىم جولدان ءوتۋ مۇلدەم مۇمكىن ەمەس. قىسقاسى, وسى كوشەنى تەگىستەپ, اسفالت توسەۋ, تازالاپ تۇرۋ سياقتى جۇمىستارعا ۇزاق ۋاقىتتان بەرى ەشكىمنىڭ تاراپىنان ەشقانداي ءمان بەرىلمەي كەلە جاتىر.
تازالىققا بايلانىستى نەگىزگى پروبلەما ەسىكتەرىمىزدىڭ الدىنداعى ۇلكەن ويىقتان تۋىنداپ وتىر. ول بۇرىن-سوڭدى تاستالعان كۇل-قوقىسقا تولى. ىشىندە نە جوق دەيسىز – تۇرمىستىق قالدىقتاردىڭ ءبارى بار. جەل تۇرسا, كۇل-قوقىستان, ءتۇرلى قالدىقتان شىققان جاعىمسىز ءيىس قولقانى قابادى. ءتىپتى جاز ايلارىندا ەسىك الدىنا شىعىپ, دامىلداپ وتىرا دا المايمىز. كىشكەنتاي ويىن بالالارى لاس زاتتاردى ۇستايدى, ودان قالسا, شىنى كەسىكتەرىنە قولدارىن جاراقاتتاپ الىپ تا جاتادى. ال جوعارىدان تومەنگە دەيىن بالانىڭ دەنساۋلىعى باستى نازاردا بولۋعا ءتيىس دەيمىز.
كوشە تۇرعىندارى جاتپاي-تۇرماي ارىزدانعان جاعدايدا تازالىققا جاۋاپتى مەكەمەنىڭ جۇمىسشىلارى كەلىپ, كۇل-قوقىس پەن ءتۇرلى قالدىقتى قاپپەن جيناعان بولدى. تالاي جىلدان بەرى قوردالانعان قوقىستى قاپپەن جيناپ تاۋىسۋ مۇمكىن ەمەس. بىزدىڭشە, ۇلكەن جۇك كولىكتەرىمەن قۇم, توپىراق اكەلىپ, ويىقتىڭ بەتىن تەگىستەپ جاۋىپ تاستاماي, بۇل ماسەلە ەش شەشىلمەيدى.
وسى ورايدا ءبىز, قاينارباەۆ اتىنداعى كوشە تۇرعىندارى قالا مەن وبلىس باسشىلىعىنا جەتكىلىكتى دەڭگەيدە قارجى قاراستىرىپ, ءبىزدىڭ پروبلەمامىزدى تۇپكىلىكتى شەشىپ بەرسە ەكەن دەگەن ءوتىنىش ايتامىز جانە دە ءوتىنىشىمىز اياقسىز قالمايدى دەپ ۇمىتتەنەتىنىمىزدى بىلدىرەمىز.
ا.ماشبەكوۆا,
ا.اسۋباەۆا, ت.ب.
حاتقا بارلىعى 10 ادام قول قويعان
قىزىلوردا