بىلتىر اپالى-ءسىڭلىلى ەكى قىزبەن بىرگە تۇردىم. ۇلكەنى مەديتسينالىق ۋنيۆەرسيتەتتە, كىشىسى ۇلتتىق جوو-نىڭ ساياساتتانۋ ماماندىعىندا وقيدى. اكەدەن ەرتە قالعان قىزدارعا شامام كەلگەنشە كومەكتەسكىم كەلەتىن. ءوز قولىممەن پىسىرگەن دامدىلەردى ۇسىنىپ, ارنايى كەستەمىز بولسا دا, ەسەپسىز ءۇي جيناي سالامىن. كىشىسى كومپوتىمدى, ۇلكەنى باۋىرساعىمدى جاقسى كورەتىن. ەكەۋى دە مەملەكەتتىك گرانتتا وقيدى.
ستيپەنديا جەتپەگەندىكتەن, ۇلكەنى وقۋ اراسىندا تىرناق بوياپ اقشا تابادى. كليەنت تارتۋ دا كادىمگىدەي جۇمىس, قولى قالت ەتكەندە تىرناق بوياۋدىڭ سان ءتۇرلىسىن ۇيرەتەتىن ۆيدەو قاراپ وتىراتىن. مەن وعان: «نەگە ودان دا ءبىر ەمحاناعا جۇمىسقا كىرمەيسىڭ؟ 5-كۋرستا وقيسىڭ, بۇل دەڭگەيدە اسسيستەنت بولا الاسىڭ عوي. ستۋدەنت كۇنىمدە وقۋ ورنىنداعى جانە قالالىق گازەتتەردە تەگىن ىستەدىم. سونىڭ جەمىسىن قازىر جەپ ءجۇرمىن. سەن بولاشاقتا تىرناق بوياۋشى ەمەس, دارىگەر اتاناسىڭ عوي», دەيتىنمىن. الايدا ول ءۇشىن كەلەشەك كاسىبىنىڭ مايتالمانى بولۋ ەمەس, اقشا, كۇنكورىس الدىڭعى ورىندا بولدى. «مەن بىتىرگەندە بيۋدجەتتىك اۋرۋحانالاردا جۇمىس ىستەمەيمىن, ايلىعى از. ءوزىم جەكەمەنشىك كلينيكا اشىپ الامىن», دەيتىن مەملەكەتتىك گرانتتا وقيتىن ول.
ءبىر كۇنى قوس قىزدىڭ كىشىسى ساباققا كۇندەگىدەن ەرەكشە دايىندالدى. بولاشاق ساياساتتانۋشى اينانىڭ الدىندا ءۇستى-باسىن تۇزەپ تۇر ەكەن. «بۇگىن بولەكشە ادەمىلەنىپ كەتىپسىڭ عوي, ستۋدەنت ەمەس, وقۋشى سەكىلدىسىڭ», دەدىم. ول كەڭ ەتەكتى, تىزەگە تۇسكەن بەلدەمشەسىن اينالا كورسەتىپ: «ەشتەڭە بايقامادىڭىز با؟», دەپ سۇرادى. باسىمدى شايقادىم. ەتەگىن ءتۇرىپ, سانىنا اينالدىرا جاپسىرىلعان «شپارگالكالارىن» كورسەتتى. «و, قۇدايىم! قايدان شىعاراسىڭدار وسىندايدى؟», دەدىم تاڭعالىسىمدى جاسىرماي. ستۋدەنت-ساياساتتانۋشى وسى ارەكەتىن ەرلىككە بالاپ, ەمتيحانعا جونەلدى. تاپسىرىپ كەلگەننەن كەيىن وتىرعىزىپ: «اقش-تاعى ءبىر كەيىپكەرىم تۋرالى ماقالا جازعاندا كوزىم شالىپ ەدى. امەريكالىق وقۋشىلار مەن ستۋدەنتتەر «شپارگالكا» پايدالانۋدى نامىس كورەدى ەكەن», دەپ باستاي بەرگەنىم سول ەدى: «قويىڭىزشى», دەدى. ونىڭ كۇلكىسىنەن ء«وزىڭىز پايدالانباعانداي سويلەيسىز عوي» دەگەندى ايتپاي-اق ۇعۋعا بولاتىن. «جەكە باسىم مەكتەپتە 9 جىل, كوللەدجدە 4 جىل, ۋنيۆەرسيتەتتە 3 جىل وقىدىم. 16 جىلدىق وقۋدا تالاي رەت ەمتيحان تاپسىردىم. بىراق «شپارگالكا» الىپ كىرگەن ەمەسپىن. ءبىر رەت كوللەدجدە كۋرستاستارىمنىڭ ءبارى قولدانعانىن كورىپ, ارام وي كەلدى. سوندا مەنى ىشتەگى ء«وزىمدى-ءوزىم الداۋدان كىم ۇتىلادى؟» دەگەن سۇراق توقتاتتى. سەن مۇعالىمدى الدايمىن دەپ ويلايسىڭ, بىراق شىن مانىندە ءوزىڭدى-ءوزىڭ الداپ تۇرسىڭ عوي», دەدىم. ول ءۇنسىز قالدى. اقيقاتىندا جەتىستىككە, جاڭا نارسەنى ۇيرەنۋگە دەگەن قادام ءوزىڭدى بىلەتىن ادامداي كورسەتۋدەن ەمەس, ءوزىڭنىڭ بىلمەيتىنىڭدى مويىنداۋدان باستالادى.
قايبىر جىلى ءبىلىم گرانتتارىن بولەتىن رەسپۋبليكالىق كوميسسيانىڭ مۇشەسى بولدىق. سەنەسىز بە, وسى ۋاقىتشا قىزمەت جايلى ەستىگەن تانىستارىمىز جان-جاقتان حابارلاستى. ءبىر اتا-انا: «كورشى, مۇمكىندىك بار ما؟ وزىنىكىنە تالاس كوپ ءارى بالل جوعارى, انەبىر ماماندىققا تۇسە سالسا دا مەيلى. گرانتقا وقىسا بولدى», دەدى. الگى ماماندىق بالاسىن قىزىقتىرا ما؟ ەرتەڭ ديپلومدى قالاي قورعايدى؟ جۇمىس ىستەي مە؟ ماڭىزدى ەمەس. ەندى ءبىرى: ء«بىزدىڭ بالا گرانت تۇگىلى اقىلىعا دا ىلىكپەي قالدى. مىنا كورسەتكىشپەن قابىلدايتىن قانداي جوو بار؟», دەپ سۇرادى. مەملەكەتتىك ۋنيۆەرسيتەتتەر ءبىر پاننەن شەكتى بالل جيناي الماعانداردى قابىلدامايدى. ەندى جەكەگە باراتىنى بەلگىلى. جاقىندا حابار الدىم, ميلليوننان اسا قارجى تولەپ وقىتاتىن بولىپتى. جانە 7 جىل. ءبىز بالالاردى ماماندىق تاڭداۋعا, كەلەشەك كاسىبىنە ۇمتىلۋعا ەمەس, «مەملەكەتتى الداپ وقيمىن دا, ديپلومى بار ادام دەگەن اتاق الامىن» دەيتىن يدەولوگياعا تاربيەلەپ جاتقاندايمىز. ال شىن مانىندە ولار مەملەكەتتى عانا ەمەس, ءوزىن-ءوزى الداپ ءجۇر.
گرانتتىق كوميسسيانىڭ مۇشەسى بولعاندا ءبىر نارسەنى انىق ۇقتىق. شىنتۋايتىنا كەلگەندە, گرانتتى جەڭىپ العاندار تىم از, كوبىسىنە تەك تاعايىندالدى, بەرىلدى. باكالاۆرعا 50 بالمەن مەملەكەتتىك گرانتقا تۇسكەندەر بار, بۇل بارلىق ۇپايدىڭ نەبارى 36 پايىزىن قۇرايدى. ونىڭ ءوزىن قالاي بەلگىلەپ الىپ شىققانىن تاپسىرۋشىنىڭ ءوزى عانا بىلەدى. ويلاڭىزشى, كوپ ماماندىقتا ءبىر ورىنعا ءبىر ادام عانا ۇمىتكەر بولىپ تۇرادى. بۇل كونكۋرس ەمەس قوي. جانە مۇنداي تۇجىرىمعا 2 جىل بۇرىن, ياعني 51 مىڭ گرانت بولىنگەندە كەلگەنبىز. بيىل گرانت سانى 73 مىڭعا جۋىقتاپ وتىر. ءسوزسىز, بىزگە ماماندار كەرەك. اسىرەسە تەحنيكانىڭ ءتىلىن بىلەتىن, تانىمىزگە قوسا جانىمىزدى ەمدەيتىن, مەملەكەتتىك جۇيەنى جەتىلدىرەتىن, ءار سالادا مىقتى ماماندار كەرەك-اق. بىراق ديپلومى بار, جۇمىسسىز ماماندار كەرەك پە؟