«الاكول» كەدەن بەكەتىندەگى كولىك كەپتەلىسى ەكى-ءۇش كۇندە شەشىلەدى. جاقىن ارادا ەلەكتروندى كەزەك جۇيەسىن ەنگىزۋ ماسەلەسى قاراستىرىلىپ جاتىر.
قىتاي حالىق رەسپۋبليكاسى باسقا ەلدەردەن كىرەتىن جۇك كولىكتەرىنىڭ سانىن ۇلعايتۋىنا بايلانىستى كەدەن بەكەتىندە كەپتەلىس پايدا بولعان. «دوستىق» بەكەتىنە قاراي قازاقستاندىقتاردان بولەك, رەسەي جانە بەلارۋس مەملەكەتتەرىنەن دە اعىلىپ جاتقان كولىك كوپ.
وسى ۋاقىتقا دەيىن شەكارادان كۇنىنە 10-15 قانا جۇك كولىگى وتسە, قازىر بۇل كورسەتكىش بىرنەشە ەسەلەنگەن. سوندىقتان كەدەن بەكەتىنە قوسىمشا ماماندار جۇمىلدىرىلدى. سايكەسىنشە, جۇمىس ۋاقىتى دا تاڭعى 8:00-دەن كەشكى 20:00-گە دەيىن ۇزارتىلدى.
«بۇعان دەيىن كەدەن بەكەتى تاڭعى 8:00-دەن كەشكى 17:00-گە دەيىن جۇمىس ىستەيتىن. جۇمىس ۋاقىتىن قوسىمشا 3 ساعاتقا سوزدىق. قۇجات سكانەرلەۋشى جانە تەكسەرۋشى مامانداردى كوبەيتتىك. جالپى سانى 31 ادام قىزمەت ەتۋدە. دۇيسەنبىدەن باستاپ تاعى 8 ادام قوسىلادى. قازىر شەكارادان كۇنىنە 100 جۇك كولىگى وتەدى. ءار كولىكتى تەكسەرۋ ۋاقىتىن دا جىلدامداتىپ جاتىرمىز», دەيدى وبلىستىق مەملەكەتتىك كىرىستەر دەپارتامەنتىنىڭ باسشىسى تالعات قوزىبەكوۆ.
كەدەن بەكەتىندە قازىر 500-دەي كولىك تۇر. ولاردى ماماندار الداعى 2-3 كۇندە تەكسەرىپ وتكىزبەك. ال كەزەك پەن ءتارتىپ ماسەلەسىن جەرگىلىكتى اكىمدىك, پوليتسيا رەتتەيدى.
«بىزدە جەدەل شتاب قۇرىلعان. ونىڭ قۇرامىندا كەدەن جانە شەكارا قىزمەتى, پوليتسيا ءبولىمى مەن كولىك پروكۋراتۋراسى قىزمەتكەرلەرى بار. قالىپتاسقان جاعدايعا بايلانىستى شتاب وتىرىسىن وتكىزدىك. ماسەلەنى جان-جاقتى تالقىلاپ, شەشۋ جولدارىن قاراستىردىق. كەزەكتى رەتتەۋ ءۇشىن ەلەكتروندى جۇيە قالىپتاسقانعا دەيىن ەسەپكە الۋ جانە وڭتايلاندىرۋ جولدارى قاراستىرىلدى», دەيدى الاكول اۋدانىنىڭ اكىمى الماس ابدينوۆ.
جالپى, كولىك وتكىزۋ الەۋەتىن ارتتىرۋ باعىتىندا كەدەن بەكەتىن كەڭەيتۋ جۇمىستارى قولعا الىندى. ماۋسىم ايىندا قوسىمشا اۆتوموبيل وتكىزۋ پۋنكتىنىڭ قۇرىلىسى باستالدى. جوبانى ىسكە اسىرۋ ءبىر جارىم جىلعا جوسپارلانعان. وندا تاۋلىگىنە ارى-بەرى 1 200-دەي كولىك تەكسەرىلىپ وتەتىن بولادى.
ەستەرىڭىزگە سالا كەتسەك, بۇعان دەيىن قورعاستاعى «نۇر جولى» وتكىزۋ بەكەتىندە دە كولىك كەپتەلىسى ورىن العان ەدى. قازىر بۇل بەكەتتە ەلەكتروندى كەزەككە قويۋ جۇيەسى ەنگىزىلىپ, ماسەلە شەشىمىن تاپتى. ناتيجەسىندە, قازىر كۇنىنە بەكەت ارقىلى ەش كەدەرگىسىز 100 شاقتى كولىك وتەدى. ەڭ باستىسى, وسى ءادىس ارقىلى سالاداعى بارلىق دەلدالدىق جانە الىپساتارلىق جۇيەلەر تولىعىمەن جويىلدى.
جەتىسۋ وبلىسى