اتىراۋلىق بالالار اراسىندا كۇردەلى وپەراتسيانى قاجەت ەتەتىن سىرقات كوپ. مۇنداي وپەراتسيالاردى جەرگىلىكتى جەردە جاساۋ وڭاي ەمەس. سوعان قاراماستان, وبلىستىق بالالار اۋرۋحاناسىنىڭ نەيروحيرۋرگتارى كۇردەلى وتالاردى قولعا الدى. ماسەلەن, بىلتىر ءتورت ايلىق ءسابيدىڭ باسىنا, ال جاقىندا ءبىر جاسار بالانىڭ ميىنا جاسالعان كۇردەلى وتا ءساتتى ءوتتى.
اناسى ءتورت ايلىق بالاسىنىڭ باس پىشىنىندەگى ديسپروپورتسيانى بايقاعان. دارىگەرلەر بالادا «باس سۇيەگىنىڭ تۋا بىتكەن پاتولوگياسى», «ساگيتالدى كرانيوستەنوز» دياگنوزى بارىن انىقتاعان. بالالار دارىگەرلەرىنىڭ پىكىرىنە قاراعاندا, تۋا بىتكەن پاتولوگيا كەزىندە باس ديسپروپورتسياسى وسە باستايدى. سول سەبەپتەن بالاعا جوسپارلى حيرۋرگيالىق ەمدەۋ, سونداي-اق كرانيوتوميا ۇسىنىلعان. وتادان كەيىن دارىگەرلەر ناۋقاستىڭ جاسىنا سايكەس باس ءپىشىنىنىڭ پروپورتسيالارىن ورنىنا كەلتىردى.
ال ەلورداداعى №2 كوپبەيىندى قالالىق بالالار اۋرۋحاناسى ورتوپەديا جانە وڭالتۋ بولىمشەسىنىڭ مەڭگەرۋشىسى, مەديتسينا عىلىمدارىنىڭ كانديداتى اعابەك چيكيناەۆ تىرەك-قيمىلى بۇزىلعان اتىراۋلىق بالالارعا بەس وپەراتسيا جاسادى. جوعارى ساناتتى ورتوپەد-تراۆماتولوگ اعابەك چيكيناەۆتىڭ ايتۋىنا قاراعاندا, اتا-انالار مۇنداي وتانى جاساتۋ ءۇشىن بالالارىن ەلورداعا نەمەسە شەتەلگە اپارۋعا ءماجبۇر.
– مەنىڭ ۇلىما تسەرەبرالدى سال اۋرۋى, گيدروتسەفاليا دياگنوزى قويىلعان. ول جۇرە الادى. بىراق اياعىن سىلتىپ باسادى. اتىراۋعا ورتوپەد-دارىگەردىڭ كەلەتىنىن ەستىپ, ويلانباستان وتا جاساتۋعا شەشىم قابىلدادىق. بىلىكتى دارىگەر جاساعان وتا ءساتتى شىقتى. ەندى ۇلىم ەش قيىندىقسىز جۇرەتىنىنە ءۇمىت ارتىپ وتىرمىن, – دەيدى 14 جاسار بالانىڭ اناسى وكتيابرينا قۇرمانعازيەۆا.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, بىلتىر «انا مەن بالا» ۇلتتىق عىلىمي ورتالىعىنىڭ 12 دارىگەرى شاقىرىلعان. ەلوردالىق دارىگەرلەر قۇرامىنداعى نەوناتولوگ, اكۋشەر-گينەكولوگ, كارديولوگ, نەۆرولوگ سەكىلدى ماماندار ءۇش كۇندە 300-گە جۋىق كەڭەس بەردى. ناۋقاس بالالارعا بەس وتا جاساپ, ءۇمىت وتىن جاندىردى.
جاقىندا وبلىستىق بالالار اۋرۋحاناسىندا ءبىر جاسار بالانىڭ ميىنا كۇردەلى وتا جاسالدى. بالاقاي مەرزىمىنەن ەكى اي بۇرىن دۇنيەگە كەلگەن. سول سەبەپتەن باستاپقىدا وبلىستىق پەريناتالدىق ورتالىقتىڭ جانساقتاۋ بولىمىندە دارىگەرلەر باقىلاۋىندا بولعان. ورتالىق دارىگەرلەرى بالانىڭ دەنساۋلىعى جاقسارماعان سوڭ بالالار اۋرۋحاناسىنىڭ نەيروحيرۋرگى شودەر اريپوۆكە جۇگىنگەن. دارىگەرلەر بالانىڭ ميىنا قان قۇيىلۋ دياگنوزىن قويعان. بۇل دياگنوز ۋلترادىبىستىق زەرتتەۋ قورىتىندىسىمەن راستالعان. بىرنەشە رەت وپەراتسيا جاسالعان. الايدا ونىڭ ميىندا التى ىسىك ءوسىپ, المانىڭ كولەمىندەي دەڭگەيگە جەتكەن.
– بالالار اراسىنداعى مۇنداي سىرقات ەلىمىزدىڭ وزگە قالالارىندا دا كەزدەسىپ ءجۇر. سول سەبەپتەن اتىراۋعا بالالار نەيروحيرۋرگى دانيار سابديناليەۆتى شەبەرلىك ساباعىن وتكىزۋگە شاقىردىق. بىرنەشە ساعاتقا سوزىلعان وپەراتسيا كەزىندە سىرقات بالانىڭ ميىنداعى التى ىسىكتى الىپ تاستادىق. قازىر ناۋقاس بالانىڭ جاعدايى قاناعاتتانارلىق دەۋگە بولادى. ءبىزدىڭ اۋرۋحانادا وسىنداي كۇردەلى وتا جاسالدى, – دەيدى نەيروحيرۋرگ شودەر اريپوۆ.
سىرقات بالالارعا ءومىر سىيلاپ, ولاردىڭ اتا-اناسىن قۋانىشقا كەنەلتىپ جۇرگەن نەيروحيرۋگ شودەر اريپوۆ ي.احۋنباەۆ اتىنداعى قىرعىز مەملەكەتتىك مەديتسينا اكادەمياسىن بىتىرگەن. دارىگەرلىك جولىن تراۆماتولوگيادا باستاپ, قاراعاندى, تاراز قالالارىنداعى اۋرۋحانالاردا تاجىريبە جيناعان. الايدا ونى نەيروحيرۋرگيا قىزىقتىرعان. ال ءتورت جىل بۇرىن وبلىستىق دەنساۋلىق ساقتاۋ باسقارماسىنىڭ شاقىرۋىمەن اتىراۋعا كوشىپ كەلگەن.
اتىراۋ وبلىسى