شىعىس قازاقستان وبلىسى ۇلان اۋدانىندا جوعالعان 3 جاسار بالا امان-ەسەن تابىلدى, دەپ حابارلايدى Egemen.kz.
23 شىلدە كۇنى كەشكى ساعات جەتىلەر شاماسىندا ادەتتەگىدەي اۋلاعا شىققان ءۇش جاسار ءادىلحان جوعالىپ كەتكەن. اكەسى تۇنگى ساعات ون بىرلەردە پوليتسياعا ارىزدانىپ, ىزدەۋ جۇمىستارى باستالعان. وقيعا ۇلان اۋدانى, تاۆريا اۋىلىندا بولعان.
اۋەلدە وزدەرى ماڭايدان ىزدەپ كورگەن. ناتيجە بولماعان سوڭ بالانىڭ اكەسى پوليتسياعا حابارلاعان.
قۇزىرلى ورگاندارعا حابار تۇسە سالا پوليتسەيلەر, ۇلتتىق ۇلاننىڭ اسكەري قىزمەتكەرلەرى, اتتى پوليتسيا, تجد قىزمەتكەرلەرى, ەرىكتىلەر جۇمىلدىرىلدى. ۇزىن سانى 621 ادام ءۇش جاسار بالانى ىزدەۋگە شىقتى. ماماندار اۋىل اۋماعىن 16 سەكتورعا ءبولىپ, وزدەرىنىڭ ءادىس-تاسىلدەرىمەن ىزدەدى. اسپانعا كۆادروكوپتەرلەر كوتەرىپ كوردى. اينالانى تىكۇشاقپەن دە ءتىنتىپ شىقتى. تۇك شىقپادى. بالانىڭ كەسكىن-كەلبەتىن سۋرەتتەپ, جان-جاققا حابارلاندىرۋلار تاراتىلدى. تەك, كەلەسى كۇنى عانا ىزدەستىرۋ جۇمىستارىنىڭ ناتيجەسىندە كريمينالدىق پوليتسيا قىزمەتكەرى ايدار دۇيسەنباەۆ 3 جاسار ءادىلحان سەيسەمبايدى تۇرعىلىقتى جەرىنەن 3 شاقىرىم جەردەن تاپقان. بالا ءدىن-امان. اتا-اناسى كومەك كورسەتكەن بارلىق ازاماتتارعا العىستارىن جاۋدىردى.