سەمەيلىكتەر ەرتىس وزەنىندە باتىپ بارا جاتقان ادامدى قۇتقارىپ قالدى. بۇل تۋرالى وبلىستىق توتەنشە جاعدايلار دەپارتامەنتى ءمالىم ەتتى, دەپ حابارلايدى Egemen.kz.
شىلدەنىڭ 24 توتەنشە جاعدايلار دەپارتامەنتىنە ەرتىس وزەنىندە 1983 جىلعى ەر ادامنىڭ سۋدان قۇتقارىلعانى تۋرالى اقپارات تۇسكەن.
بەلگىلى بولعانداي, قالا تۇرعىنى سەرگەي فومينىح سۋدا ەشبىر قيمىلسىز قالقىپ بارا جاتقان ەر ادامدى بايقاپ, سول ساتتە كومەككە ۇمتىلادى. وعان ەر ازاماتتى وزەننەن الىپ شىعۋعا ەرجان جاڭگىروۆ كومەكتەسكەن. ولار زارداپ شەككەن ادامعا بىردەن العاشقى مەديتسينالىق كومەك كورسەتە باستاعان. قۇتقارۋشىلاردىڭ قاتارىنا ۆيكتور گلينسكي ەسىمدى قالا تۇرعىنى دا قوسىلىپ, رەانيماتسيالىق ارەكەتتەر جاساۋعا جاردەمسكەن.
«رەانيماتسيالىق ارەكەتتىڭ 4-ءشى مارتەسىندە ەر ازامات ەسىن جيىپ, ونى جەدەل جاردەم دارىگەرلەرىنە تاپسىردى. بەلگىلى بولعانداي, زارداپ شەگۋشى دوسىمەن بىرگە وزەننىڭ بەلگىلەنبەگەن جەرىندە شومىلىپ جۇرگەندە ەسىنەن تانىپ قالعان», دەلىنگەن تاراتىلعان اقپاراتتا.
بۇل رەتتە توتەنشە جاعدايلار قىزمەتى سۋ ماڭىنداعى ءتارتىپ ەرەجەلەرىن قاتاڭ ساقتاۋدى ەسكەرتەدى. اسىرەسە بەلگىلەنبەگەن ورىنداردا شومىلۋدان باس تارتىپ, سۋعا ماس كۇيىندە تۇسپەۋگە, جالعىز جۇرمەۋگە, سول سەكىلدى ءجۇزۋ داعدىلارىن مەڭگەرمەگەن جاندارعا وزەن-كولدەرگە تۇسۋدەن ساق بولۋعا كەڭەس بەرەدى.