ءبىر اپتا ىشىندە ەلىمىزە بولعان كولىك اپاتتارىنان 50-گە جۋىق ادام كوز جۇمدى. بۇل تۋرالى ءىىم اكىمشىلىك پوليتسيا كوميتەتى توراعاسىنىڭ ورىنباسارى جاندوس مۇراتاليەۆ ايتتى, دەپ حابارلايدى Egemen.kz.
«جىل باسىنان بەرى جول اپاتتارىندا مىڭنان استام ادام قازا تاۋىپ, 8 مىڭنان استام ازامات جاراقات الدى. كۇن سايىن ەلىمىزدىڭ جولدارىندا 7-گە جۋىق ادام قازا تاۋىپ, 70-كە تارتا ادام ءتۇرلى دەنە جاراقاتتارىن الىپ جاتادى. تەك وتكەن اپتادا عانا ۆەدومستۆولىق مالىمەتتەرگە سايكەس, ەلىمىزدە 200-دەن استام جول-كولىك وقيعاسى تىركەلدى, وندا 50-گە جۋىق ادام قازا تاۋىپ, 200-دەن استام ادام جاراقات الدى», دەدى جاندوس مۇراتاليەۆ بريفينگ بارىسىندا.
سونداي-اق جىل باسىنان بەرى 2 مىڭعا جۋىق بالا ءتۇرلى جاراقات الىپ, 90-نان استامى قايتىس بولعان.
«جول اپاتتارىن تالداۋ بارىسىندا ولاردىڭ نەگىزگى سەبەپتەرى جىلدامدىق رەجيمىن اسىرۋ, مانەۆر جاساۋ ەرەجەلەرىن بۇزۋ, قاراما-قارسى ءجۇرىس جولاعىنا شىعۋ, اۋدارىلۋ, جاياۋ جۇرگىنشىلەردى باسىپ كەتۋ بولىپ وتىر», دەدى كوميتەت توراعاسىنىڭ ورىنباسارى.