پارلامەنت ءماجىلىسىنىڭ دەپۋتاتى سەرىك ەرۋباەۆ اتىراۋ وبلىستىق اۋرۋحاناسىنىڭ دارىگەرلەرىمەن كەزدەستى. دەپۋتاتپەن جۇزدەسۋدە ادام جانىنا اراشا بولىپ جۇرگەن مەديتسينا قىزمەتكەرلەرى وزدەرىن تولعاندىرعان تۇيتكىلدى ماسەلەنى كوتەردى.
بىرىنشىدەن, كوروناۆيرۋس ينفەكتسياسى كۇرت ورشىگەن 2020 جىلى دارىگەرلەرگە ۇستەمەاقى تولەنگەن. بىراق بىلتىردان بەرى بۇل قارجى جارتىلاي قىسقارىپ قالعان. ەندى بيىل قاۋىپتى دەرت قايتا تارالا باستادى. بۇل جايت دارىگەرلەردى الاڭداتىپ وتىر. ەكى جىل بۇرىنعى جاعداي قايتالاناتىن بولسا, بۇرىنعىداي قوسىمشا ۇستەمە قايتادان تولەنە مە؟ بيىل بۇل ماسەلە قالاي شەشىمىن تابادى؟
ەكىنشىدەن, بەس جىل سايىن دارىگەرلەر بىلىكتىلىك ساناتىن الۋ ءۇشىن جينالاتىن قۇجاتتار وتە كوپ. دارىگەرلەر بۇعان ءبىراز ۋاقىتىن جوعالتادى. قۇجات تولىق جينالماسا, وسى كەزگە دەيىن الىپ جۇرگەن جالاقىسىنان ءبىر ساتتە قاعىلادى.
ناۋقاستاردى شيپالى ەمىمەن دە, جىلى سوزىمەن دە ەمدەيتىن دارىگەرلەر وسىنداي ۇسىنىستارىن ايتتى. ال دەپۋتات بۇل ۇسىنىستاردى ءماجىلىس وتىرىسىندا كوتەرۋگە نيەتتى ەكەنىن جەتكىزدى. ونىڭ ايتۋىنشا, دارىگەرلەر ورىندى ماسەلە كوتەرىپ وتىر.
– الايدا بارلىق ماسەلەنى وڭ شەشۋ ءۇشىن قارجى قاجەت. وسى ورايدا جالاقى ءتاريفى مەن قىزمەت قۇنىنىڭ وسىرىلگەنى ءجون. بۇل ۇسىنىستى سالالىق مينيسترلىك پەن ۇكىمەتكە ساۋال رەتىندە جولدايمىز. ەگەر ۇسىنىس ءتيىستى ورىندار تاراپىنان قولداۋ تاپسا, مەديتسينا سالاسىنداعى ءتۇيىندى ماسەلەلەر وڭىنان شەشىلەدى, – دەيدى سەرىك ەرۋباەۆ.
اتىراۋ وبلىسى