پرەمەر-مينيستر ءاليحان سمايىلوۆ 2022 جىلعى 27 مامىرداعى اقمولا وبلىسىنا جۇمىس ساپارىنىڭ قورىتىندىسى بويىنشا بەرىلگەن تاپسىرمالاردى ورىنداۋ ماسەلەلەرى جونىندە كەڭەس وتكىزدى, دەپ حابارلايدى Egemen.kz.
كەڭەسكە قاتىسۋشىلار ءوڭىردى سەلەكتسيانىڭ زاماناۋي ادىستەرىنە كوشىرۋ, مال سويۋدى جۇزەگە اسىراتىن كاسىپورىندارعا قويىلاتىن سانيتارلىق تالاپتاردى قاتايتۋ جانە ەت وڭدەيتىن كاسىپورىندارعا شيكىزات جەتكىزۋدى ىنتالاندىرۋ بويىنشا جۇرگىزىلىپ جاتقان جۇمىستى تالقىلادى.
ودان بولەك, ءوڭىردىڭ اۋىل شارۋاشىلىعىن سۋبسيديالاۋ باعدارلامالارىن قارجىلاندىرۋ, اۋىل شارۋاشىلىعى تەحنيكاسىن ەسەپكە الۋ بويىنشا بىرىڭعاي تسيفرلىق پلاتفورما قۇرۋ, وبلىستى قاجەتتى كولەمدە مازۋتپەن قامتاماسىز ەتۋ جانە كوكشەتاۋ قالاسىندا جەو سالۋ ماسەلەلەرى قارالدى.
سونىمەن قاتار كوكشەتاۋدا كارىز-تازارتۋ عيماراتتارىن رەكونسترۋكتسيالاۋ جانە سۋ تازارتۋ قۇرىلىستارىن سالۋ بويىنشا جوبالار, اۋىلدىق ەلدى مەكەندەردى سۋمەن جابدىقتاۋدى دامىتۋ جوبالارىن قارجىلاندىرۋ, نورماتيۆتىك جاي-كۇيدەگى جولداردىڭ ۇلەسىن ارتتىرۋ جانە اۋىل شارۋاشىلىعى تەحنيكاسى كومپونەنتتەرى ءوندىرىسىن لوكاليزاتسيالاۋ ماسەلەلەرى تالقىلاندى.
سونداي-اق كەڭەسكە قاتىسۋشىلار اوك ءۇشىن بىلىكتى كادرلاردى دايارلاۋدىڭ قوسىمشا شارالارىن, وبلىستاعى مەكتەپتەر قۇرىلىسىن قارجىلاندىرۋ نۇسقالارىن, سونىمەن قاتار ساۋدا قىزمەتىن رەتتەۋ جانە پوليمەرلىك قاپتاما وندىرەتىن وتاندىق تاۋار وندىرۋشىلەردى قولداۋ تەتىكتەرىن قاراستىردى.
كەڭەستى قورىتىندىلاي كەلە, قر پرەمەر-ءمينيسترى اقمولا وبلىسى جانە باسقا دا وڭىرلەرگە جۇمىس ساپارلارى كەزىندە بەرىلگەن تاپسىرمالاردىڭ ورىندالۋىن ەرەكشە باقىلاۋدا ۇستاۋ قاجەتتىگىن اتاپ ءوتتى.
«تاپسىرمالاردا وڭىرلەر مەن تۇرعىنداردىڭ ناقتى ماسەلەلەرى كورسەتىلگەن. ولاردى شەشۋ كەرەك. سوندىقتان بارلىق كوتەرىلگەن ماسەلەلەردى شەشۋدى اياعىنا دەيىن جەتكىزۋ كەرەكتىگىنە تاعى دا نازار اۋدارعىم كەلەدى», دەدى ءاليحان سمايىلوۆ.