سەيسەنبى كۇنى سولتۇستىك ماكەدونيا مەن البانيانىڭ ەۋرووداققا قوسىلۋى تۋرالى رەسمي كەلىسسوزدەر باستالدى, دەپ حابارلايدى Egemen.kz Euronews-كە سىلتەمە جاساپ.
ەۋروكوميسسيا ءتورايىمى ۋرسۋلا فون دەر ليايەن قوس ەلدىڭ پرەمەر-مينيسترلەرىمەن جۇرگىزگەن كەلىسسوزدەردە بۇل ۇدەرىس جىلدارعا سوزىلسا دا, قوسىمشا ساياسي جانە ەكونوميكالىق تۇراقتىلىق اكەلەدى دەپ ۇمىتەنەتىنىن جەتكىزدى.
«ينۆەستيتسيا اعىلىپ, ساۋدا بايلانىستارى جاقسارادى. ەنەرگەتيكا جانە كولىك سياقتى نەگىزگى سالالاردا تىعىز ىنتىماقتاستىق ورنايدى. ەو قاراجاتىن كوبىرەك جانە بارىنشا ءتيىمدى پايدالانۋ مۇمكىندىگى تۋادى. بۇل جاڭا جۇمىس ورىندارى مەن جاڭا بيزنەس مۇمكىندىكتەرى پايدا بولاتىنىن بىلدىرەدى», دەدى ەۋروكوميسسيا ءتورايىمى.
سولتۇستىك ماكەدونيا ەۋرووداققا كانديدات مارتەبەسىن 2005 جىلى العان ەدى.
ايتا كەتەرلىگى, قوس ەلدىڭ ەۋرووداققا كىرۋىنىڭ ناقتى مەرزىمى ءالى بەلگىلەنبەگەن. مۇشەلىك تۋرالى كەلىسسوزدەردىڭ ءساتتى ءوتۋى ەلدەردىڭ ەو زاڭدارى مەن ەرەجەلەرىن, زاڭ ۇستەمدىگى قاعيداتتارىن قانشالىقتى جىلدام قولدانۋىنا, سونداي-اق سىبايلاس جەمقورلىقپەن ءساتتى كۇرەسۋگە كەپىلدىك بەرە الاتىنىنا بايلانىستى بولىپ وتىر.