بۇگىن 2022 جىلعى 15 شىلدەدە قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن «Tomiris» اقپاراتتىق-ءبىلىم بەرۋ باعدارلاماسى شەڭبەرىندە العاشقى ترەنينگ وتكىزىلدى, دەپ حابارلايدى Egemen.kz.
باعدارلاما ايەلدەر مەن قىزداردىڭ باسقارۋشىلىق الەۋەتى مەن ساياسي مادەنيەتىن دامىتۋعا باعىتتالعان.
اقپارات جانە قوعامدىق دامۋ ۆيتسە-ءمينيسترى ا.س. دانيلوۆ سەمينار قاتىسۋشىلارىن قۇتتىقتادى.
ء«بىزدىڭ باستى باسىمدىعىمىز - بارلىق قازاقستاندىقتار ءۇشىن ادىلەتتىلىك پەن تەڭدىكتى قامتاماسىز ەتۋ. جوبا قالالار, سونداي-اق اۋىلدارداعى تابىسقا جەتكەن قىزدار مەن ايەلدەردى قولداۋعا جانە ولاردى قوعامدىق جانە ساياسي ومىرگە تارتۋعا مۇمكىندىك بەرەدى», دەدى ول ءوز سوزىندە.
باعدارلامانىڭ مىندەتى– بەلسەندى ايەلدەردى ناقتى وقىتۋدى جۇزەگە اسىرۋ ماقساتىندا ءار ءوڭىر بويىنشا وڭىرلىك ساراپشىلار پۋلىن قۇرۋ.
40-تان استام ايەلدەر مەن قىزدار وقىتىلاتىن بۇگىنگى ترەنينگ تاقىرىبى: «قازاقستان ازاماتتارىنىڭ گەندەرلىك قۇقىقتارى مەن بوستاندىقتارىن ىسكە اسىرۋ قوعامنىڭ وڭ وزگەرۋىنىڭ شارتى رەتىندە».
وقىتۋدى «قازاقستاننىڭ تەڭ قۇقىقتارى مەن تەڭ مۇمكىندىكتەرى ينستيتۋتى» قوعامدىق قورىنىڭ ساراپشىلارى جۇرگىزەدى.
«باعدارلاما اياسىندا بىرقاتار ءىس-شارالار, ونىڭ ىشىندە كوشباسشى ايەلدەردى وقىتۋ جوباسى جوسپارلانۋدا. ءبىز كونكۋرستىق نەگىزدە بارلىق وڭىرلەردەن 30 كورنەكتى ايەل كوشباسشىنى تاڭداپ, ولاردى نۇر-سۇلتان قالاسىندا وتەتىن وقىتۋ باعدارلاماسىنا جىبەرەمىز. وقىتۋ ساياسي كوشباسشىلىق داعدىلارىن, ءبىلىم مەن قۇزىرەتتىلىكتى دامىتۋعا باعىتتالادى, بۇل قاتىسۋشىلارعا ءارتۇرلى دەڭگەيدەگى باسشى لاۋازىمدارعا تاعايىندالۋعا نەمەسە سايلانۋعا كومەكتەسەدى. جاقىندا ءبىز وسى وقۋ باعدارلاماسىنا وتىنىمدەر قابىلداۋدىڭ باستالعانى تۋرالى جاريالايمىز. الداعى ۋاقىتتا سەرىكتەستەرىمىزبەن بىرگە باعدارلامانىڭ اۋقىمىن كەڭەيتىپ, جاڭا جوبالار مەن قۇرامداس بولىكتەرىن قوساتىن بولامىز», دەپ اتاپ ءوتتى ساياسي مەنەدجمەنت اكادەمياسىنىڭ ديرەكتورى دانيار مۇقيتانوۆ.
«Tomiris» باعدارلاماسى اياسىندا ەلىمىزدىڭ بارلىق وڭىرلەرىنەن كەلگەن ايەلدەر مەن قىزداردى وقىتۋ ءىس-شارالارىمەن جانە اقپاراتتىق جۇمىسپەن قامتۋ جوسپارلانۋدا. ونىڭ ىشىندە: گەندەرلىك ستەرەوتيپتەر جانە بۇقارالىق كوممۋنيكاتسيا ارنالارىن قولدانا وتىرىپ, ولاردى ەڭسەرۋ جولدارى, گەندەرلىك سەزىمتال ساياساتتى قالىپتاستىرۋ, ەكونوميكا مەن يننوۆاتسيالاردى دامىتۋداعى ايەلدەردىڭ ءرولى تاقىرىپتارى تەرەڭىنەن قوزعالادى.
ايتا كەتسەك, «Tomiris» باعدارلاماسىن قر اقپارات جانە قوعامدىق دامۋ مينيسترلىگى مەن «AMANAT» پارتياسىنىڭ ساياسي مەنەدجمەنت اكادەمياسى قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن, كونراد ادەناۋەر قورىنىڭ جانە باسقا سەرىكتەستەردىڭ قولداۋىمەن جۇزەگە اسىرادى.