مەملەكەت باسشىسى مارات احمەتجانوۆتى قابىلدادى

مەملەكەت باسشىسىنا ەلىمىزدەگى كريمينوگەندىك جاعداي, ىشكى ىستەر ورگاندارىنىڭ بيىلعى ءبىرىنشى جارتىجىلدىقتا اتقارعان جۇمىستارىنىڭ ناتيجەلەرى جونىندە مالىمەت  بەرىلدى.

پرەزيدەنتكە قىلمىس دەڭگەيىنىڭ ايتارلىقتاي تومەندەگەنى تۋرالى باياندالدى. مارات احمەتجانوۆتىڭ ايتۋىنشا, قاراقشىلىق, بوپسالاۋ جانە مال ۇرلىعى فاكتىلەرى ازايعان. قوعامدىق ورىندار مەن كوشەلەردەگى قاۋىپسىزدىك دەڭگەيى كوتەرىلگەن.

مينيسترلىك پوليتسيا تەرگەۋىنىڭ ۆيدەوفورماتىن ەنگىزۋ ماسەلەسىن پىسىقتاپ جاتىر. سونداي-اق قىلمىستىق پروتسەستى تسيفرلاندىرۋ ءىسى جالعاسۋدا. بۇگىندە بارلىق قىلمىستىق قۇقىق بۇزۋشىلىقتىڭ 81,7 پايىزى ەلەكتروندىق فورماتتا تەرگەلەدى.

قىلمىستىق پروتسەستىڭ ءۇش بۋىندى مودەلىن ىسكە اسىرۋ اياسىندا اسا اۋىر ساناتتاعى 928 ءىستى تەرگەپ-تەكسەرۋ جۇمىستارى اياقتالىپ, سوتقا جولداندى. مىسالى, ەلوردالىق پوليتسەيلەر كومپانيالاردىڭ ءبىرىنىڭ ديرەكتورىنا قاتىستى قىلمىستىق ءىستى سوتقا جولدادى. ول نورۆەگيا كورولدىگىنە جۇمىسقا ورنالاستىرامىن دەگەن جەلەۋمەن قازاقستاننىڭ 123 ازاماتىن الداپ, 149 ميلليون تەڭگەدەن استام كولەمدە زالال كەلتىرگەن. كۇدىكتى كىنالى دەپ تانىلىپ, 7 جىلعا باس بوستاندىعىنان ايىرىلدى.

سونىمەن قاتار سەگىز ۇيىمداسقان قىلمىستىق توپتىڭ قىزمەتى توقتاتىلدى. ۇيىمداسقان قىلمىستىق توپ قۇرۋ جانە ونى باسقارۋعا قاتىستى 16 قىلمىستىق ءىس تەرگەلىپ جاتىر.

ەسىرتكى قىلمىسىنا قارسى كۇرەس اياسىندا جىل باسىنان بەرى 1354 قىلمىس انىقتالدى. «قارا نارىقتاعى» قۇنى شامامەن 4,5 ميلليارد تەڭگە بولاتىن زاڭسىز اينالىمداعى 3,5 توننا ەسىرتكى تاركىلەندى.

مينيستر مەملەكەت باسشىسىنا قوعامدىق قاۋىپسىزدىكتى حالىقپەن بىرلەسىپ قامتاماسىز ەتۋ جونىندەگى تۇجىرىمدامانىڭ نەگىزگى ەرەجەلەرى تۋرالى مالىمدەدى.

كەزدەسۋ سوڭىندا قاسىم-جومارت توقاەۆ ىشكى ىستەر ورگاندارىن تسيفرلاندىرۋ, جول اپاتتارىنىڭ الدىن الۋ جۇمىستارىن جانداندىرۋ ماڭىزدى ەكەنىن اتاپ ءوتتى. پرەزيدەنت ەلىمىزدەگى قاۋىپسىزدىك پەن قۇقىقتىق ءتارتىپتى ودان ءارى قامتاماسىز ەتۋ جونىندە بىرقاتار مىندەت جۇكتەدى.