بۇل تۋرالى مەملەكەت باسشىسى ۇكىمەتتىڭ كەڭەيتىلگەن وتىرىسىندا ايتتى, دەپ حابارلايدى Egemen.kz.
«مەديتسينا سالاسىنا بولىنگەن قارجى كولەمى ارتقانىمەن, مۇندا قوردالانعان ماسەلەلەر شەشىمىن تاپپاي وتىر. مىندەتتى الەۋمەتتىك مەديتسينالىق ساقتاندىرۋ جۇيەسى ءتيىمدى بولمادى, ناقتى ناتيجە جوق. ءۇش ميلليونعا جۋىق ادام مەديتسينالىق ساقتاندىرۋدان تىس قالعان. سونىڭ كەسىرىنەن ولار دەنساۋلىق ساقتاۋ سالاسىنداعى قىزمەتتەردى تولىق پايدالانا المايدى.
ۇكىمەت ستراتەگيالىق جوسپارلاۋ جانە رەفورمالار اگەنتتىگىمەن بىرلەسىپ, مەديتسينالىق ساقتاندىرۋ جۇيەسىن جەتىلدىرۋ جونىندە ۇسىنىستار دايىنداۋى كەرەك.
كەلەسى وزەكتى ماسەلە – دەنساۋلىق ساقتاۋ جۇيەسىن تسيفرلاندىرۋ. بۇل جۇمىس وتە باياۋ ءجۇرىپ جاتىر. جالپى, تسيفرلاندىرۋدىڭ قازىرگى دەڭگەيى دارىگەرلەردىڭ جۇمىسىن جەڭىلدەتىپ وتىرعان جوق.
دەنساۋلىق ساقتاۋ سالاسىندا 40-تان استام اقپاراتتىق جۇيە جۇمىس ىستەيدى. ءار جۇيەنىڭ ءوز كەمشىلىكتەرى بار. مينيسترلىك بولسا, جاۋاپكەرشىلىكتەن قاشىپ, ناقتى شەشىم قابىلداماي وتىر. ال, مۇنىڭ زاردابىن دارىگەرلەر مەن ازاماتتار تارتۋدا. ۇكىمەت وسى ماسەلەنى تەز ارادا شەشۋى كەرەك», دەدى پرەزيدەنت ۇكىمەتتىڭ كەڭەيتىلگەن وتىرىسىندا.