بەلگىلى ەكونوميست جاقسىبەك قۇلەكەەۆ «Egemen Qazaqstan» گازەتىنە بەرگەن ەكسكليۋزيۆتى سۇحباتىندا كاسپي قۇبىر كونسورتسيۋمىنىڭ جابىلۋى الەمدىك نارىققا قالاي اسەر ەتەتىنىن ايتتى, دەپ حابارلايدى Egemen.kz.
«كاسپي قۇبىر كونسورتسيۋمىنا قاتىستى سوت شەشىمى ءالى كۇشىنە ەنگەن جوق. سوندىقتان مۇناي تاسىمالداۋ ۇدەرىسى دە ازىرشە توقتامادى. ءبارى شتاتتىق رەجىمدە جۇمىس ىستەپ تۇر. ارينە, كونسورتسيۋمنىڭ قازاقستان ءۇشىن ماڭىزى زور. بىلتىر الەم نارىعىنا شىعارعان 67 ملن توننا مۇنايدىڭ 54 ملن تونناسىن وسى قۇبىر ارقىلى ەكسپورتتادىق. جاپ-جاقسى كورسەتكىش», دەدى ەكونوميست.
جاقسىبەك قۇلەكەەۆ قازىرگى ۋاقىتتا الەمدىك نارىقتا مۇناي تاپشىلىعى جوق ەكەنىن ايتتى.
«ەگەر كونسورتسيۋم جابىلسا, الەم نارىعىنا ءونىم جەتپەي قالۋى مۇمكىن. ياعني مۇناي ساتىلىمى ازايادى. بۇل الەمدىك نارىقتى تەڭسەلتىپ, باعانىڭ قىمباتتاۋىنا الىپ كەلۋى مۇمكىن. مەنىڭشە, كونسورتسيۋمعا قاتىستى شەشىمدەردىڭ جىلدام قابىلدانىپ جاتقاندىعىنىڭ استارىندا باسقاشا ءمان جاتىر. بۇل مۇناي باعاسىنىڭ تومەندەۋىنە قارسى جاسالىپ جاتقان ارەكەت سەكىلدى. باعانىڭ ارزانداۋىنا G7 ەلدەرى باسشىلارىنىڭ كەزدەسۋى دە اسەر ەتكەن سىندى. الپاۋىت مەملەكەتتەردىڭ باسشىلارى سوڭعى كەزدەسۋدە باعانى قازىرگى دەڭگەيدە ۇستاپ, ودان ءارى كوتەرمەۋگە ۋاعدالاستى. مۇنىڭ ەكونوميكالىق نەگىزى مىنادا: رەسەي ءوز مۇنايىن نارىقتاعى باعادان 40 دوللارعا ارزان ساتۋدا, سالدارىنان مۇنايىن وتكىزە الماعان يران دا باعانى ارزانداتتى, ەندى وزگە مەملەكەتتەر دە باعانى تومەندەتۋگە ءماجبۇر. مۇناي باعاسىنىڭ ارزانداۋى ءدال قازىر رەسەيگە مۇلدەم قاجەت ەمەس. جالپى, قازىرگى ۋاقىتتا الەمدىك نارىقتا مۇناي تاپشىلىعى جوق. كاسپي قۇبىر كونسورتسيۋمىنا قاتىستى سوت شەشىمى وسى تەندەنتسيانى بۇزۋ ءۇشىن, ياعني مۇناي باعاسىن ازداپ كوتەرۋ ءۇشىن قابىلدانعان سەكىلدى. ءبىز ءۇشىن كاسپي قۇبىر كونسورتسيۋمى توڭىرەگىندەگى ماسەلەنىڭ دۇرىس شەشىلگەنى كەرەك. ويتكەنى مۇناي ءوندىرۋ ءارى تاسىمالداۋ – ۇزدىكسىز جۇرەتىن ۇدەرىس. ونى توقتاتۋعا بولمايدى», دەدى جاقسىبەك قۇلەكەەۆ ءوز سوزىندە.