عىلىم جانە جوعارى ءبىلىم ءمينيسترى ساياسات نۇربەك ەلىمىزدەگى جوعارى وقۋ ورىندارىنا بولىنگەن گرانت سانىن اتادى, دەپ حابارلايدى Egemen.kz.
«بۇگىننەن باستاپ قازاقستاننىڭ بۇكىل وڭىرلەرىندە قابىلداۋ كوميسسياسى قۇجات قابىلداۋدى باستادى. جەرگىلىكتى جوعارى وقۋ ورىندارىنىڭ جانە ۇلتتىق تەستىلەۋ ورتالىعىنىڭ وزىندە قۇجاتتار قابىلدانۋدا. ناۋقان بۇكىل جوو نەگىزىندە ۇيىمداستىرىلعان. كەز كەلگەن تالاپكەر قۇجاتتارىن وقۋ ورداسىنا بارىپ نەمەسە ونلاين تۇردە تاپسىرۋعا مۇمكىندىك ۇسىنىلىپ وتىر. Zoom, Teams پلاتفورمالارى, تەلەفون ارقىلى تاپسىرىپ, قۇجاتتارىن پوشتامەن جولداۋىنا بولادى», دەدى س.نۇربەك.
ونىڭ ايتۋىنشا, بيىل باكالاۆر مەن ماگيستراتۋرانى قوسا العاندا 88 111 گرانت بولىنگەن. بۇل وتكەن جىلمەن سالىستىرعاندا 16%-عا كوپ. ولاردىڭ ىشىندە 73 مىڭى باكالاۆريات ماماندىقتارىنا ارنالعان.
«بيىلعى جىلدىڭ ەرەكشەلىگى – پرەزيدەنت تاپسىرماسىنا سايكەس باسىمدىق تەحنيكالىق-ينجەنەرلىك ماماندىقتارعا بەرىلىپ وتىر. ياعني, اتالعان باعىتقا 60% گرانت ءبولىندى», دەدى مينيستر.