استانا. 29 ءساۋىر. م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە وقىعان ءدارىسى كەزىندە پرەزيدەنت نۇرسۇلتان نازارباەۆ ەكونوميكالىق ينتەگراتسيانىڭ حالىقتار اراسىنداعى دوستىق پەن مادەني-رۋحاني بايلانىستاردى ودان ءارى دامىتاتىنىنا توقتالدى. بۇل تۋرالى egemen.kz ءتىلشىسى حابارلادى.
مادەني بايلانىستار مەن تەرەڭ دوستىق قارىم-قاتىناستاردىڭ ەكونوميكاعا تيگىزەتىن جاقسى اسەرىن, وڭ ىقپالىن ءسوز ەتكەن نۇرسۇلتان نازارباەۆ: «ءححى عاسىر مادەني سەگمەنتتى ىشكى جالپى ءونىمنىڭ وسۋىندە قوماقتى پايىزدار اكەلەتىن ۇلتتىق ەكونوميكالاردىڭ ءسوزسىز ماڭىزدى قۇرامداس بولىگىنە اينالدىرادى. بۇل – تۋريزم, سونىڭ ىشىندە تاريحي-مادەني, ەكولوگيالىق جانە مەديتسينالىق تۋريزم. بۇل – يننوۆاتسيالىق-يندۋستريالىق دامۋ مەن باسقارۋ جۇيەسى ءۇشىن ايرىقشا ماڭىزدى ءبىلىم بەرۋ قىزمەتتەرى. بۇل – ەكونوميكانىڭ كوڭىل كوتەرۋ, سپورت سەكتور جانە اقپاراتتىق ءونىم ءوندىرىسى. سونىمەن بىرگە, مادەني-گۋمانيتارلىق ينتەگراتسيا ۇدەرىسىنىڭ قانداي دا ءبىر سەگمەنتتىڭ ۇستەمدىگىنەن ەۋرازيالىق كەڭىستىكتەگى رۋحاني-مادەني الۋاندىلىقتى جويىپ جىبەرمەۋى دە ماڭىزدى», – دەدى.
نۇرسۇلتان نازارباەۆ ءدارىس بارىسىندا ۇلتتىق مادەنيەتتەرگە قۇرمەتپەن قاراۋ كەرەكتىگىنە دە نازار اۋداردى. ول: «مەن ءبىزدىڭ كەز كەلگەن ەلىمىزدە مادەنيەتتىڭ ۇلتتىق مازمۇنىنىڭ ەروزياسىنا جول بەرۋگە بولمايدى دەپ ەسەپتەيمىن. سوندىقتان مۇشە مەملەكەتتەردىڭ مەكتەپتەرى مەن جوعارعى وقۋ ورىندارىندا ءبىر-ءبىرىمىزدىڭ تاريحىمىزدى, ادەبيەتىمىزدى مادەني مۇرالار مەن ءتىلدى وقىپ-ۇيرەنۋدى ىنتالاندىرۋدىڭ ماڭىزى زور», دەدى.
بۇعان قوسا, مەملەكەت باسشىسى كەلەشەكتە پايدا بولۋى ىقتيمال ەۋرازيالىق حابار تاراتۋ قۇرىلىمدارى ينتەگراتسيالىق ۇدەرىسكە قاتىساتىن بارلىق ەلدەردىڭ مەملەكەتتىك تىلدەرىن قولدانعانى ماڭىزدى دەپ ەسەپتەيتىنىن ايتتى.
جولدىباي بازار.
دەرەككوز: egemen.kz.
فوتو: Astana-akshamy.kz.