استانا. 29 ءساۋىر. قازاقستاندا مەملەكەتتىك قىزمەتكەرلەردى كونكۋرس بويىنشا تاعايىنداۋ 3,5 ەسە ءوسىپ, اۋىسۋ تارتىبىمەن تاعايىنداۋ 20 ەسەگە قىسقارعان. بۇل تۋرالى بۇگىن ورتالىق كوممۋنيكاتسيا قىزمەتىندە مەملەكەتتىك قىزمەت ىستەرى اگەنتتىگىنىڭ توراعاسى ءاليحان بايمەنوۆ مالىمدەدى.
مەملەكەتتىك قىزمەت جاڭا مودەلىنىڭ اسپەكتىلەرى مەن «ا» كورپۋسىنا ىرىكتەۋدىڭ ارالىق قورىتىندىسى جونىندە جان جاقتى اڭگىمەلەگەن ءا.بايمەنوۆ پەرسونالدى باسقارۋ قىزمەتتەرىن كاسىبيلەندىرۋ جايىنا ەرەكشە توقتالدى. اگەنتتىك توراعاسىنىڭ سوزىنە قاراعاندا, ەگەر بۇرىن اۋداندىق جانە اۋىلدىق دەڭگەيدە نەگىزگى جۇمىسىمەن قاتار «كادر قىزمەتىنىڭ» مىندەتتەرىن ورىنداۋدى قوسا اتقارىپ جۇرگەن 5 مىڭعا جۋىق ادام جۇمىس ىستەسە, ال 2013 جىلدىڭ ناۋرىزىنان باستاپ جالپى سانى 500 ادامنان تۇراتىن 191 پەرسونالدى باسقارۋدىڭ بىرىڭعاي قىزمەتى قۇرىلعان. مىنە, وسىنداي بىرىڭعاي كونكۋرستىق كوميسسيالاردىڭ ارقاسىندا اۋىلدىق جانە اۋداندىق دەڭگەيدە «الەۋمەتتىك ليفت» جاڭاشا جۇمىس ىستەي باستاپتى. سونداي-اق «ە-قىزمەت» پەرسونالدى باسقارۋدىڭ شوعىرلانعان اقپاراتتىق جۇيەسىنىڭ ەنگىزىلۋىمەن, جاڭا مۇمكىندىكتەر پايدا بولادى دەپ كۇتىلۋدە.
مەملەكەتتىك قىزمەتكە ىرىكتەۋ قۇرالدارىن جەتىلدىرۋگە قاتىستى سوزىندە اگەنتتىك توراعاسى وتكەن جىلدان بەرى ازاماتتاردىڭ كونكۋرستى كۇتپەي-اق تەستىلەۋدەن وتۋگە قۇقىعى بارلىعىن جەتكىزدى. بۇل تەستىلەۋگە قاتىسۋشىلار سانىن ەكى ەسەگە كوبەيتكەن. ەگەر 2011 جىلى تەستىلەۋگە ورتا ەسەپپەن ايىنا 1950 ادام قاتىسسا, 2012 جىلى – 2300, ال 2013 جىلى 4700 ادامعا جەتكەنى بەلگىلى بولدى. بۇگىنگى تاڭدا ەلىمىز بويىنشا 25 مىڭ ادامنىڭ قولىندا تەستىلەۋدەن وتكەنى تۋرالى سەرتيفيكات بار.
اسقار تۇراپباي ۇلى.
دەرەككوز: egemen.kz.
فوتو: news.mail.ru.