بيىل كوللەدجدەرگە 128 مىڭنان استام تالاپكەر مەملەكەتتىك تاپسىرىسپەن قابىلدانادى, دەپ حابارلايدى Egemen.kz. بۇل تۋرالى وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا ايتتى.
«بيىل كوللەدجدەرگە مەملەكەتتىك تاپسىرىس ورنالاستىرۋ تالابى كۇشەيتىلدى. بۇگىندە 770 كوللەدجدىڭ 647-ءسى مەملەكەتتىك تاپسىرىس ورنالاستىرۋعا مۇمكىندىك الدى. كوللەدجدەرگە بيىل 213 ماماندىق بويىنشا 128 مىڭنان استام تالاپكەر مەملەكەتتىك تاپسىرىسپەن قابىلدانادى دەپ كۇتىلەدى. جالپى, مەملەكەتتىك تاپسىرىس كولەمى 50 مىڭ ورىنعا ۇلعايتىلدى. ونىڭ 45 مىڭى رەسپۋبليكالىق بيۋدجەت ەسەبىنەن وتەلەدى. سونىڭ ىشىندە 20 مىڭى كاسىپورىنداردىڭ ۇسىنىسى بويىنشا ماقساتتى مەملەكەتتىك تاپسىرىسقا بەرىلەدى. مەملەكەت باسشىسىنىڭ تاپسىرماسىنا سايكەس, بيىل تەحنيكالىق ماماندىقتارعا گرانت كولەمى 27 مىڭ ورىنعا ۇلعايتىلىپ, 70 مىڭ ورىندى قۇرايدى», دەدى دەپارتامەنت ديرەكتورى مينيسترلىكتىڭ اپپارات جينالىسىندا.
ونىڭ اتاپ وتۋىنشە, وقۋعا قۇجاتتاردى قابىلداۋ ماۋسىمنىڭ 25-ىنەن باستالدى. جالپى, بيىل 160 مىڭنان استام تالاپكەر كوللەدجدەرگە قۇجات تاپسىرادى دەگەن بولجام بار.
«تالاپكەر 4 اماندىق, 4 كوللەدج تاڭداۋعا مۇمكىندىگى بار. ماماندىقتاردى تاڭداۋ ءۇشىن كاسىبي دياگنوستيكادان وتۋگە مۇمكىنشىلىك قاراستىرىلعان. وقۋعا ءتۇسۋ ەمتيحاندارى الىنىپ تاستالدى. جالپى, وقۋعا ءتۇسۋ ورتاشا كونكۋرستىق باللمەن وتكىزىلەدى», دەدى ناسىمجان وسپانوۆا.