يننوۆاتسيالىق گرانتتىڭ كومەگىمەن ۇنتاق پوليپروپيلەندى تۇيىرشىكتەۋ تەحنولوگياسى يگەرىلۋدە. بۇل – يندۋستريالىق-يننوۆاتسيالىق باعدارلامانىڭ تاعى ءبىر جەمىسى.
اتالعان تەحنولوگيانى ەنگىزۋ «نەفتەحيم LTD» وتاندىق كاسىپورنى مەن «تەحنولوگيالىق دامۋ جونىندەگى ۇلتتىق اگەنتتىك» اق اراسىنداعى يننوۆاتسيالىق گرانت الۋ تۋرالى كەلىسىمشارت شەڭبەرىندە جۇزەگە اسىپ وتىر. كەلىسىمشارتقا سايكەس, گرانت يەسىنە قارجى جوبا ىسكە اسىرىلعاننان كەيىن ناقتى شىعىننىڭ جارتىسىن وتەۋ ارقىلى بەرىلەدى.
كومپانيانىڭ ديرەكتورى ەرلان قۇسانوۆتىڭ ايتۋىنشا, اتالعان جوبا 2014 جىلدىڭ اياعىنا دەيىن اياقتالۋى ءتيىس. «ۇنتاق پوليپروپيلەندى تۇيىرشىكتەۋ تەحنولوگياسىن قولدانۋ كاسىپورىننىڭ وندىرىستىك-شارۋاشىلىق قىزمەتىنىڭ تيىمدىلىگىن جانە ەڭبەك ونىمدىلىگىن ايتارلىقتاي ارتتىرۋعا ءمۇمكىندىك بەرەدى. تەحنولوگيالىق دامۋ ءجونىندەگى ۇلتتىق اگەنتتىكتىڭ قولداۋىمەن كاسىپورىننىڭ ينۆەستيتسيالىق جوبالارى ىسكە اسىرىلۋدا», دەيدى كاسىپورىننىڭ جەتەكشىسى.
ۇنتاق پوليپروپيلەن – بۇل ءتۇرلى پلاستماسسا ونىمدەرىن, ياعني, پوليپروپيلەن قاپتارىن, قۇبىرلار, تالشىقتار مەن وزگە دە تاۋارلار شىعارۋ ءۇشىن ارنالعان پوليمەر. ءتۇيىرشىكتەلگەن پوليپروپيلەن ماتەريالدار مولشەرلەۋگە, ساقتاۋعا, تاسىمالداۋعا وتە ىڭعايلى. سونىمەن قاتار, ول قويمالاردا ساقتاۋعا دا قولايلى, كولەمى ورىندى كوپ المايدى.
«نەفتەحيم LTD» كومپانياسى بۇگىندە پاۆلودارداعى ءوندىرىسى ورىستەپ كەلە جاتقان بىرەگەي كاسىپورىنداردىڭ ءبىرى. ال ەندى اتالعان يننوۆاتسيانى ەنگىزۋ ءوندىرىستى ودان ءارى جانداندىرا تۇسپەك. سەبەبى, قوندىرعىنى ينفراقۇرىلىمنىڭ جانىندا ورناتۋ دايىن ءونىمنىڭ وزىندىك قۇنىن ازايتادى, سوعان بايلانىستى باعاسى باسقا ۇقساس تاۋار وندىرۋشىلەرگە قاراعاندا تومەن بولماق. بۇل ونىمگە دەگەن سۇرانىستى ۇلعايتۋعا, جەتكىزۋ نارىعىن كەڭەيتۋگە, سول ارقىلى كاسىپورىننىڭ قۋاتىن بارىنشا يگەرۋگە مۇمكىندىك بەرەدى. ەڭ باستىسى, يننوۆاتسياعا نەگىزدەلگەن مۇنداي ونىمدەر ەرتەڭگى ەۋرازيالىق ەكونوميكالىق كەڭىستىكتە باسەكەگە توتەپ بەرەر ءونىمنىڭ ءبىرى بولارىنا سەنىم زور.
دينارا بىتىكوۆا,
«ەگەمەن قازاقستان».