وبلىس اكىمدىگىندە پرەزيدەنت جانىنداعى مەملەكەتتىك باسقارۋ اكادەمياسىنىڭ كوشپەلى تانىستىرىلىمى بولىپ ءوتتى. وعان مەملەكەتتىك قىزمەتشىلەر, اۋداندار اكىمدەرىنىڭ اپپارات جەتەكشىلەرى قاتىستى. اكادەميا جانە ونىڭ قۇرىلىمدارى تۋرالى بەينەفيلم كورسەتىلدى. سودان كەيىن پرەزيدەنت جانىنداعى مەملەكەتتىك باسقارۋ اكادەمياسى ساياسي-قوعامدىق پروتسەستەر مەن تەحنولوگيالار كافەدراسىنىڭ مەڭگەرۋشىسى, فيلوسوفيا عىلىمدارىنىڭ دوكتورى, پروفەسسور مارات بيەكەنوۆ جوعارعى وقۋ ورنى جانە قانداي ماماندىقتارعا دايارلايتىنى, وقىتۋ ساپاسى, كىمدەر ساباق بەرەتىنى جايىندا اڭگىمەلەدى .
ونىڭ ايتۋىنشا, پرەزيدەنت جانىنداعى مەملەكەتتىك باسقارۋ اكادەمياسى مەملەكەتتىك قىزمەتشىلەردى, اتاپ ايتقاندا, ديپلوماتيالىق قىزمەت پەن سوت جۇيەسى ءۇشىن ماماندار دايارلاۋ, قايتا دايارلاۋ جانە بىلىكتىلىگىن ارتتىرۋ باعدارلامالارىن ىسكە اسىراتىن نەگىزگى عىلىمي, ادىستەمەلىك جانە ءبىلىم بەرۋ ورتالىعى بولىپ تابىلادى. مۇندا ءدارىس وقيتىن 69 وقىتۋشىنىڭ 28-ءى عىلىم دوكتورى, 39-ى عىلىم كانديداتى ەكەن.
اكادەميا قۇرىلعاننان بەرى 400-دەن استام اكىمشىلىك جانە ساياسي مەملەكەتتىك قىزمەتشىلەردى دايارلاپتى. قايتا دايارلاۋ جانە بىلىكتىلىكتى ارتتىرۋ كۋرستارىنان 14000-عا جۋىق ادام وتكەن. اكادەميا تۇلەكتەرىنىڭ 10 پايىزى مينيسترلىكتەرگە, 40 پايىزى جوعارعى سوت جۇيەسىنە جۇمىسقا ورنالاسسا, 27 پايىزىنىڭ قىزمەتتىك لاۋازىمى وسكەن, 100-دەن استامى “بولاشاق” باعدارلاماسى بويىنشا وقۋعا تۇسكەن. پرەزيدەنت اكىمشىلىگىندە, ۇكىمەتتە, ورتالىق جانە جەرگىلىكتى مەملەكەتتىك باسقارۋ ورگاندارىندا جۇمىس ىستەيدى, ولاردىڭ ىشىندە مينيسترلەر, ۆيتسە-مينيسترلەر, مەملەكەتتىك ۆەدومستۆولار باسشىلارى بار. ماگيستراتۋرا مەن اسپيرانتۋرا باعدارلامالارى بويىنشا وقۋدى اياقتاعاندار مەملەكەتتىك تاپسىرىس نەگىزىندە مەملەكەتتىك لاۋازىمعا كونكۋرستان تىس ورنالاسۋىنا قۇقىعى بار ەكەن.
تانىستىرىلىم كەزىندە مارات بيەكەنوۆ وقۋعا مۇددەلى مەملەكەتتىك قىزمەتشىلەرگە اكادەميانىڭ ماتەريالدىق-تەحنيكالىق بازاسىمەن, ءبىلىم بەرۋ باعدارلامالارىمەن, قابىلداۋ ەرەجەسىمەن جانە وقۋ مەرزىمدەرىمەن, وقۋعا تۇسۋشىلەرگە قويىلاتىن تالاپتارى جايىندا, مول اقپارات بەردى.
ساتىبالدى ءساۋىرباي, اقتوبە وبلىسى.