الماتىنىڭ تۇركسىب اۋدانىندا ەلەكترمەن جابدىقتاۋ جەلىلەرىنىڭ 70%-ى توزىپ كەتكەن. سونىڭ سالدارىنان اۋداندا جەلىلەر ءجيى ءۇزىلىپ, تۇرعىندار جارىقسىز قالادى. بۇل تۋرالى قالا اكىمى ەربولات دوساەۆ قالا تۇرعىندارىمەن كەزدەسۋ كەزىندە ايتتى, دەپ حابارلايدى Egemen.kz.
اكىمنىڭ ايتۋىنشا, قالاعا قوسىلعان «قايرات», «المەرەك», «نۇرشاشقان» شاعىناۋداندارىنىڭ جەلىلەرى ابدەن توزعان.
«مۇنداعى جەلىلەر قۋاتتى تالعار اۋداندىق ەلەكتر ستانتسياسىنان الادى. ال, ستانتسيانىڭ الىس ورنالاسۋى ەلەكتر ەنەرگياسىنىڭ تۇراقتى بەرىلۋىنە دە كەرى اسەر ەتەدى. وسى ماسەلەنى شەشۋ ءۇشىن «تۇزدىباستاۋ» پودستانتسياسى سالىنىپ جاتىر. قۇرىلىسى 2022 جىلدىڭ جەلتوقسان ايىندا اياقتالادى», دەدى ەربولات دوساەۆ.
ول بيىلعى جىلدىڭ سوڭىنا دەيىن «شۋاقتى» شاعىناۋدانىنداعى ەلەكتر جەلىلەرى جاڭارتىلاتىنىن, اۋداننىڭ 26 جەردەگى جالپى ۇزىندىعى 21,1 كم جەلىگە رەكونسترۋكتسيا جۇمىستارى اياقتالاتىنىن جەتكىزدى.