VII استانا ەكونوميكالىق فورۋمى اياسىندا قازاقستان رەسپۋبليكاسى ادىلەت مينيسترلىگىنىڭ ۇيىمداستىرۋىمەن 2014 جىلعى 21 مامىردا «انتيكونترافاكت» فورۋمى وتكىزىلەدى.
«انتيكونترافاكت» فورۋمى, بۇل – كونترافاكتىلى جاساندى ونىممەن كۇرەس, زياتكەرلىك مەنشىك نىساندارىنا قۇقىقتاردى قورعاۋ جانە تاۋارلار مەن كورسەتىلەتىن قىزمەتتەردىڭ وركەنيەتتى نارىعىن قالىپتاستىرۋ سالاسىندا بيلىك, بيزنەس, عىلىم وكىلدەرىنىڭ, قۇقىق يەلەنۋشىلەردىڭ, وندىرۋشىلەردىڭ, اۆتورلار مەن جۇرتشىلىقتىڭ سىندارلى سۇحبات قۇرۋىنا ارنالعان حالىقارالىق الاڭ. فورۋمنىڭ باستى تاقىرىبى كونترافاكتىلى, بۇرمالانعان جانە ساپاسىز ونىمدەر اينالىمىنا قارسى كۇرەس جانە ونى ۇيىمداستىرۋعا بايلانىستى ماسەلەلەر توڭىرەگىندە بولادى.
«انتيكونترافاكت» فورۋمىنىڭ اياسىندا بەس سەسسيا ءوتكىزىلەدى دەپ جوسپارلانۋدا. ءبىرىنشى سەسسيا كەدەن وداعى شەڭبەرىندە زياتكەرلىك مەنشىك سالاسىنداعى زاڭنامالاردى ءۇيلەستىرۋ ماسەلەلەرىنە ارنالادى. ەكىنشى سەسسيادا ازىق-ت ۇلىك, فارماتسەۆتيكالىق قاۋىپسىزدىك جانە بالالار تاۋارلارىنىڭ قاۋىپسىزدىگى جايلى ماسەلەلەر قاراستىرىلادى. كەلەڭسىز قۇبىلىستاردىڭ ءبىرى – پيراتتىق, بۇگىنگى كۇنى مۋزىكالىق اۋديو جانە بەينە ونىمدەردە كەڭىنەن تارالىپ وتىر. «ينتەرنەت جەلىسىندە زياتكەرلىك مەنشىك قۇقىقتارىن قامتاماسىز ەتۋ» اتتى ءۇشىنشى سەسسيادا وسى تاقىرىپ تالقىلاناتىن بولادى. كەدەن وداعىنا مۇشە مەملەكەتتەردىڭ بەك اۋماعىندا كونترافاكتىلى جانە جالعان ءونىمنىڭ ءوندىرىلۋى مەن تاراتىلۋىنا قارسى ءىس-ارەكەت بويىنشا ءوزارا ءىس-قيمىلىنىڭ ستراتەگياسىن جاساپ شىعۋ قاجەتتىلىگى جونىندە ءتورتىنشى سەسسيادا ايتىلادى. سونىمەن قاتار, ارنايى ماماندار فورۋم بارىسىندا زياتكەرلىك مەنشىك قۇقىقتارىن قامتاماسىز ەتۋ – جوسىقسىز باسەكەدەن قورعاۋ ماسەلەلەرىن تالقىلايدى.
«انتيكونترافاكت» فورۋمىنىڭ سپيكەرلەرى مەن قاتىسۋشىلارى قازاقستان رەسپۋبليكاسى, رەسەي فەدەراتسياسى, بەلارۋس رەسپۋبليكاسى ۇكىمەتتەرىنىڭ; دۇنيەجۇزىلىك زياتكەرلىك مەنشىك ۇيىمىنىڭ (دزمۇ); ەۋرازيالىق ەكونوميكالىق كوميسسيانىڭ (ەەك); دۇنيەجۇزىلىك كەدەن ۇيىمىنىڭ (WCO); دۇنيەجۇزىلىك دەنساۋلىق ساقتاۋ ۇيىمىنىڭ; ينتەرپولدىڭ; حالىقارالىق تاۋار تاڭبالارى قاۋىمداستىعىنىڭ (INTA); حالىقارالىق فونوگراممالار وندىرۋشىلەرى فەدەراتسياسىنىڭ (IFPI); افريكا زياتكەرلىك مەنشىك ۇيىمىنىڭ, تمد ەلدەرى مەن الىس شەتەلدەردىڭ مەملەكەتتىك ورگاندارىنىڭ, قوعامدىق ۇيىمداردىڭ, قۇقىق يەلەنۋشىلەردىڭ, جوو-لاردىڭ وكىلدەرى جانە باسقا دا مۇددەلى تۇلعالار بولىپ تابىلادى.
«ەگەمەن-اقپارات».